«Барселона» 115 ёшда ёхуд куннинг 7 воқеаси

Одатдагидек бугунги куннинг энг муҳим воқеаларини сизнинг эътиборингизга ҳавола қиламиз. 

Футболчи сотиб олиш – дўкондан нарса харид қилиш эмас
Журналистлар Арсенал" бош мураббийи Арсен Венгердан жамоани кучайтириш ҳақида сўрашганида у қуйидагича жавоб қайтарди: "Футболчи сотиб олиш дўкондан нарса ҳарид қилиш эмас. Мен бирор бир клубга бориб: "Илтимос, менга ҳов анави ўнг қанот ҳимоячиси ва мана бу марказий ҳимоячини бериб юборинг" дея олмайман" Ҳақиқатдан ҳам жаноб Венгернинг гапларига қўшилиш мумкин. "Арсенал" олдин футболчи сотиб олишда ҳасислик қиларди. Бироқ сўнгги 2 мавсумда "канонирлар" пулни тежаш одатидан бироз бўлса ҳам воз кечишди. Венгернинг гапларидан хулоса қиладиган бўлсак, клуб январда бирор футболчи сотиб олмайди. Кузатамиз, воқеалар ривожи қандай бўларкан?

Бразилиядаги энг нуфузли инсон Неймар экан!
Бу табиий ҳол. Бразилия футбол мамлакати, шу боис ҳам бу диёрда футболчилар жуда машҳур. "Форбес" журнали Бразилиянинг энг нуфузли инсон сифатида Неймарни тан олди. Ушбу футболчи бугунги кунда "Барселона" ва Бразилия терма жамоасининг ҳақиқий етакчисига айланиб улгурди. Дарвоқеа, рейтингда Неймардан кейинги ўринларни Давид Луис, Данни Алвес, Пеле ва Роберто Карлос синграи футболчилар жой олишган.

Агентлар учун 115 миллион
Англия Премер лигасида иштирок этаётган клублар охирги бир йил ичида футболчиларнинг агентлари учун 115 миллион фунт тўлашган экан. Бу борада Лондоннинг "Челси" клуби пешқадамлик қилмоқда. "Арситократлар" агентларга 16 миллион фунтдан ортиқ маблағ сарфлашган. Футбол агентлари айрим футболчилардан ҳам кўпроқ даромад қилишса ажаб эмас.

Брендан Роджерс истъефога чиқармикан?
Олти ой олдин Англияда мавсумнинг энг яхши мураббийи сифатида эътироф этилган "Ливерпул" бош мураббийи Брендан Роджерс, ҳозирда Премер лигада истеъфога чиқиш учун биринчи номзод бўлиб турибди. Мураббий омадсизликлар ботқоғига ботиб қолганидан сўнг, айнан шундай гапларни айтиб ўтган эди. Хўш "қизиллар" раҳбарияти Роджерсни ишдан олармикан? Менимча, унга имконият беришса керак. Агар вазият янги йилгача янгиланмаса, у ҳолда раҳбарият унинг истеъфоси ҳақида бош қотириб кўришса керак. 

Ўзбекистонга ОЧЛда "3+1"та ўрин берилди!
ОФК Ижроқўми келаси йили бўлиб ўтадиган Осиё Чемпионлар лигаси учун квоталарни тасдиқлади ва унга кўра Ўзбекистонга 3+1 ўрин берилди. Бу биз учун жуда ҳам яхши хабар бўлди. Энди нуфузли турнирда "Пахтакор", "Локомотив" ва "Насаф" жамоалари тўғридан-тўғри иштирок этишса, "Бунёдкор" саралашнинг учинчи босқичидан мусобақага киришади. Демак ОЧЛ тарихида биринчи марта Ўзбекистондан тўртта жамоа гуруҳ босқичида иштирок этиши мумкин. Энди клубларимиз ҳам шунга яраша тайёргарлик олиб боришлари лозим. Клубларимиз ҳозирги таркиблари билан узоққа боришлари қийин.

"Барселона" 115 ёшда!
1899 йилнинг 29 ноябрида "Барселона" клубига асос солинган эди. Демак, бугун клуб ўзининг 115 ёшини қарши олди. Каталонияликлар ана шу давр ичида 22 марта Испания чемпионлигини ва 4 марта Чемпионлар лигасини қўлга киритишга муваффақ бўлишди.

"Реал"га Ройс керак эмас!
Мадриднинг "Реал" клуби "Боруссия" Дортмунд ярим ҳимоячиси Марко Ройсни сотиб олиш фикридан воз кечибди. Германиялик футболчи ўтган ҳафтада жароҳат олиб сафдан қайтган эди. Анчелотти жамоасида ҳозирча футболчилар етарли. Балки шу боис ҳам клуб Маркони ўз таркибига қўшиб олиш истагидан кечгандир. Нима бўлган тақдирда ҳам, Ройснинг совчилари талайгина.

P.S: Uff.uz, Stadion.uz сайтидаги янгиликлар асосида тайёрланди.

Фурқат Юсупов