Ҳар қандай жараённинг аввали ва охири муқаррар. Жумладан, футболчи ҳам қачондир ўз фаолиятига нуқта қўяди. Бироқ бинойидек тўп сураётган футболчининг кутилмаган қарори кўпчиликни ўйлантириб қўяди: Нега кетди? Қуйидаги ҳикоямиз миллионлар ўйинини барвақт тарк этганлар ҳақида.
Марсель Янсен
Кетиш сабаби: клубга бўлган садоқат.
Марсель шу йилнинг ноябрида 30га тўлади. Шунга қарамай, футбол билан хайрлашишга мажбур бўлди. Чунки «Гамбург» у билан шартномани узайтиришни истамади. Мутасаддилар ҳолатни Янсен кўпроқ вақтини шифохонада ўтказаётгани билан изоҳладилар. Германия терма жамоаси собиқ ҳимоячиси Европа клубларидан кўплаб таклифлар олди. Аммо уларни мулойимлик билан рад этди. «Мен фақат мухлислар учун тўп сурганман. Ҳаётимда 3та клуб - «Боруссия» М., «Бавария», ва «Гамбург» учун бор кучимни сарфлашга тайёр эдим. Мухлислар қаршисида ёлғон сўзлаш ниятим йўқ. Шу боис уларга ҳақиқатни айтаман: Бошқа жамоалар байроғини ўпишга ўзимни мажбурлай олмайман, уларга содиқ қолиш қўлимдан келмайди. Чунки улар мени қизиқтирмайди».
Жамоага бўлган садоқат тобора ноёб фазилатга айланаётган ҳозирги кунларда Марселнинг сўзлари самимий эканлигига ишонгинг келади.
Эрик Кантона
Кетиш сабаби: кинодаги фаолият.
Кантонанинг 30 ёшда бутсаларини михга илиши кўпчиликни лол қолдирди. Ваҳоланки, у ўз фаолиятининг чўққисига кўтарилган, «МЮ» билан кўплаб совринларни қўлга киритаётганди. Охир-оқибат, «Бавария» билан бўлган ЕЧЛнинг тарихий финали унинг иштирокисиз ўтди. Эме Жаке билан чиқиша олмаган футболчи Франция терма жамоасининг Европа ва жаҳон чемпионлигини қўлга киритишида ёрдам бера олмаганди.
Кейинчалик маълум бўлишича, Эрикдаги кинога бўлган қизиқиш футболдан устун келган. Ҳужумчи футболчилик давридаёқ актёр сифатида дебютини нишонлаган, фаолиятини якунлагандан кейин яна 3та картинада суратга тушган.
Муҳаммад Али Хон
Кетиш сабаби: экология.
Авлодлари Ливан ва Германия фуқароларига бориб тақаладиган швециялик футболчининг ҳаёти сўнгги 1 йил ичида тубдан ўзгарди. Аввалига у рад этишнинг иложи бўлмаган таклифга эга бўлди: Хитойнинг «Тяньзин Теда» клуби «Хеккен» футболчисига фантастик гонорар таклиф қилганди. Аммо Скандинавиянинг мусаффо ҳавосига ўрганиб қолган футболчи экологияси талаб даражасида бўлмаган Чин ўлкаси шароитига кўника олмади. «Хитойнинг ҳавоси ўта ифлослиги сабабли болалар доимий равишда уйда ўтиришга мажбур эдилар. Катта маошга эга бўлиш яхши, лекин мен аввало, оила аъзоларимга ғамхўрлик қилишим керак», - дейди футболчи. Хуллас, номаълум гўшт истеъмол қилишдан ҳайиқиши туфайли Хитойда умуман гўшт емаган Али Хон қишда Швецияга қайтди ва маҳаллий «Хальмстад» билан шартнома имзолади.
Карлос Роа
Кетиш сабаби: диний эътиқод.
ЖЧ-1998нинг аргентиналик қаҳрамони руҳоний эканлигини ҳеч қачон сир тутмаган. 1999 йилда у «Мальорка» билан Испания суперкубогини қўлга киритган, кубок эгалари кубоги турнирида финалгача етиб борганди. Бироқ кутилмаганда у ҳам 29 ёшида (футболчилар учун қалтис ёш) муваффақиятли мавсумни давом эттиришни истамади. Кейинги 1 йилни черковда ўтказган Рео кейинчалик «Мальорка» билан шартномани узайтиришни хоҳламади. Шунга қарамай, жамоа кейинчалик уни сафга қўшиб олди. Аммо Карлос аввалгидек 1-рақамли футболчи эмасди. Қизиғи, у ўзининг футболчилик фаолиятини Аргентинанинг «Олимпо»сида тўғридан-тўғри қизил карточка олиш билан якунлади.
Хидетоши Наката
Кетиш сабаби: мода саноатидаги фаолият.
Бу футболчи ҳам худди Янсен каби 29 ёшда футболчиликни йиғиштирди. Япон халқининг «кумир»и ўзининг модага бўлган муҳаббатини ҳеч қачон яширмаган, Италиядаги узоқ муддатли фаолият эса уни ўз орзусига яқинлаштирганди. «Италияликлар менга кучли таъсир кўрсатишди. Улар модани худди футболдек яхши кўришади. У ерда мен футболда ҳам, олифта кийиниш бобида ҳам ўзимни кўрсатишга интилдим. Дизайн ҳаётни янада ёрқинроқ қилишига шубҳа қилмайман», - деганди футболчи ўшанда.
Доимо турли либосларни синовдан ўтказадиган япониялик ярим ҳимоячи ўзининг сўнгги учрашувини 2006 йилнинг майида «Болтон» сафида ўтказди. 1 йилдан кейин эса GQ журналининг Америка вариантида кузги, қишки либослар фотосессиясида иштирок этди. Кейин Cavin Klein компанияси билан ички либослар тўпламини намойиш қилиш хусусида келишиб олади. Наката футболни барвақт тарк этганлигидан афсусланмайди ва яқин келажакда янги спорт либослари яратиш ниятида.
Киан Хансен
Кетиш сабаби: отасининг бетоблиги.
Дания термаси ҳимоячиси ўтган йил ёзида «Эсбьерг»дан «Нант»га ўтиб, жамоа етакчиларидан бирига айланди. Унинг ўйинларидан мамнун бўлган Франция клуби мутасаддилари жуда мамнун эдилар ва Хансенни қўйиб юбориш ниятида эмасдилар. Бироқ ҳимоячи ватанига қайтишга рухсат беришларини сўраб, сўзида қатъий туриб олди. Маълум бўлишича, 26 ёшли футболчи «Нант»да тўп суриб юрганида бувиси қазо қилган, бу мусибат Кианга кучли таъсир ўтказганди. Рождество таътилидан сўнг у бутунлай уйга қайтишга қарор қилди. Мақсади - бемор отасининг ёнида қолиб , унга ёрдам бериш. Табиийки, у «Мидьюлланн»га ўтиши билан каттагина маблағдан маҳрум бўлди. Аммо Хансен саратон хасталиги билан курашаётган падарига оз бўлсада далда бера олганидан мамнун: «Бошимга оғир кунлар тушганида ҳаётда футболдан аҳамиятлироқ нарсалар ҳам борлигига амин бўлдим. Оила қанчалик муҳим эканлигини тушуниб етдим».
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
