28 март куни Уммон олимпия терма жамоасининг франциялик бош мураббийи Пол Ле Гуэн Ўзбекистонга қарши ўйинолди матбуот анжуманида иштирок этди. Мутахассис рақибга қарши муҳим ўйинда ўз жамоасининг кучига ишонишини айтиб ўтди.
«Эртага биз кучли рақибга қарши кураш олиб борамиз. Бу мазкур турнирнинг финал ўйинидир. Агар биз Сурия олимпия терма жамоасига қарши ўйинимизни Ўзбекистон билан ҳам намойиш қила олсак, албатта ўз мақсадимизга эришамиз. Шогирдларим буни жуда яхши тушуниб туришибди ва улар «жанг»га тайёр».
Франциянинг «Лион» клуби билан уч марта мамлакат чемпионлигини қўлга киритган Ле Гуэн 29 март кунги ўйинда Ўзбекистон олимпия терма жамоаси фаворит эканини қайд этиб ўтди.
«Гарчи Ўзбекистон Сурияга қарши ўйинда кўпчилик кутганидан ёрқин футбол намойиш қила олмаган бўлсада, барибир мақсадига ета олди. Энди Ўзбекистон ҳисобида 3 очко бор. Демак эртанги ўйинда Ўзбекистон – фаворит, биз эса аутсайдермиз. Лекин яна бир бор қайтараман, Сурия билан ўйиндака футбол намойиш қила олсак, омад албатта биз тарафда бўлади».
«Омаднинг бу қадар юз ўгириши жуда кам бўлади. Сурия билан ўйинда биз тўпни тўлиқ назорат қилган бўлсакда, якунда дуранг натижа қайд этилди. Худди шундай воқеа билан биз ҳам Ўзбекистонни мағлуб этишимиз мумкин».
«Мен албатта ҳамкасбимнинг ўрнида бўлиб қолишни хоҳлардим. Чунки унинг аҳволи меникидан анча яхши. Навбатдаги босқичга чиқиш учун уни дуранг натижа ҳам қаноатлантиради. Бироқ бу ҳолат унинг шогирдларига аксинча таъсир қилиши мумкин. Улар хоҳлашадими ёки йўқ, дуранг натижа ҳақида ўйлашади».
Матнда хатолик топсангиз, ўша хатони белгилаб, бизга жўнатинг (Ctrl + Enter).