Кўп йиллар давомида Наманганнинг “Навбаҳор” жамоаси шарафини ҳимоя қилиб, бугунги кунда “Нефтчи” футболчиси сифатида фаолиятини давом эттираётган Жаҳонгир Меҳмоновни водийлик мухлислар яхши танишади. Яқиндагина Фарғонадаги “Рухсор” телерадиоканали ижодкорлари мазкур футболчи хақида фильм яратишди.
Фильм давомида футболчининг миллионлар ўйини дунёсига кириб келиш тарихи, оиласи, шахсий ҳаёти кенг тарзда ёритилди. Қуйида эса ана шу фильмда келтирилган маълумотлар асносида, “Нефтчи” ҳимоячисининг ҳаёти билан қисқача танишишингиз мумкин.
1990 йил, 28 май. Шу куни Намангандаги Меҳмоновлар оиласида яна бир ўғил фарзанд дунёга келди. Унга ота-онаси дунё кўрсин, жаҳон кезсин деб Жаҳонгир дея исм қўйишди. Меҳмоновлар оиласида илгаридан футболга бефарқ бўлинмаган. Оила боши ҳисобланмиш Нуриддин Меҳмонов миллионлар ўйинининг ашаддий ишқибози бўлгани учун ўз фарзандларини айнан шу соҳага йўналтиришга қарор қилган.
Нуриддин Меҳмонов, тўрт фарзанднинг отаси, уч ўғил ва бир қиз. Катта Меҳмонов биринчилардан бўлиб ўғли Шерзод Меҳмоновни футболчи бўлишини истаб, уни футбол лицейига берди. Бироқ Шерзод кўп ўтмай, жароҳат олиб сафдан чиқди, устига устак бетоб бўлиб қолди. Шифокорлар Шерзодга футбол ўйнашда давом эттирса, бу унинг саломатлигига жиддий хавф туғдиришини айтиб, профессионал футбол билан шуғулланишни қатъиян тақиқлаб қўйдилар. Аммо бу ҳолат Шерзодни кўп ранжитмади. Сабаби, унинг кетидан яна бир Меҳмонов футболчи сифатида шаклланиб келаётганди. Бу Жаҳонгир Меҳмонов эди.
Жаҳонгир 8 ёшидан бошлаб миллионлар ўйини сир-синоатларини қунт билан ўрганишга киришди. У секин-асталик билан шаҳар сўнг вилоят миқёсидаги турнирларда муваффақиятли иштирок этиб, “Навбаҳор” мутасаддиларининг назарига тушди. Кўп ўтмай, Меҳмоновга Наманган бош жамоасининг ўринбосарлар таркибидан чақирув бўлди. Бу ҳолатни эса Меҳмоновлар оиласи қувонч билан қабул қилишди. Бу орада эса йиллар мобайнида қилинган меҳнат дастлабки эътирофларга сабаб бўла бошлаганди.
Шундай қилиб, Жаҳонгир Меҳмонов “Навбаҳор” жамоасининг ўринбосарлар таркибида тўп суришни бошлади. “Навбаҳор”да ўз иқтидори ва маҳоратини намойиш этиш учун ҳамда асосий таркибга лойиқ ижрочи эканлигини исботлаш учун Меҳмоновга атига бир мавсум етарли бўлди. У бир йиллик ўринбосарлар жамоасидаги фаолиятидан сўнг асосий таркибга жалб қилинди. Қаҳрамонимиз 18 ёшидаёқ Олий лигада, Наманган бош жамоаси либосида тўп тепишни бошлади. Меҳмонов шу зайлда 5 мавсум “лочинлар” шарафини ҳимоя қилиб, Водийнинг энг маҳоратли ҳимоячиси сифатида танилди. Аммо 2014 йилнинг дастлабки ойларида “Нефтчи” собиқ раҳбари Комилжон Мирзабоев Меҳмоновни Фарғонага таклиф қилган. Наманганлик ҳимоячи эса бу таклифга узоқ ўйлаб ўтирмай, рози бўлди. Трансфер масалалари муваффақиятли ҳал этилгач, Жаҳонгир Фарғонага отланди.
Шундай қилиб, Меҳмонов фаолияти давомида биринчи марта ўз жамоасини ўзгартирди. Жаҳонгир Меҳмонов “Нефтчи” жамоаси билан улкан ютуқларни қўлга киритиш мақсадида фарғоналиклар билан ўз фаолият йўлини боғлади. Аммо ҳимоячининг айтишига қараганда, у ҳеч қачон бир кун келиб “Навбаҳор”ни тарк этиши ҳақида умуман ўйламаган экан. Меҳмоновни келажакдан умиди катта. Уни “Нефтчи”ни эртаси десак муболаға бўлмайди. Мурод Исмоилов қўл остида фаолият олиб бораётган футболчи тобора фарғоналик ишқибозларнинг суюклисига айланиб бормоқда. Ундан жамоа раҳбарлари кўп нарса кутишяпти.
Энди эса қаҳрамонимиз ҳақида якуний хулоса қиламиз. Футбол майдонида 22 нафар ижрочи бир-бирига қарши рақобат олиб боради. Курашади, натижа учун ҳаракат қилади. Жаҳонгир эса ана шу рақобат майдонининг энг масъулиятли ва энг кўп меҳнат талаб қиладиган ҳудудида тўп суради. Тўғри, у ҳимоячи. Аммо эътибор берадиган бўлсак, футболчиларнинг амплуаси уларнинг ҳаётдаги характерини белгилаб беради. Иродали, матонатли ва ўзига бўлган ишончи мустаҳкам бўлган ижрочиларгина, айнан ҳимоя зонасида жамоа шарафини ҳимоя қилади. Жаҳонгир ҳаётда ҳам ўзига қаттиқ ишонади. Ёшликдан ота-она берган тарбия, акадан ўтган ғайрат, истеъдод, яқинларининг унга бўлган ишончи бугун Жаҳонгирни мана шундай инсон бўлиб шакланишига сабаб бўлди. Биз Ўзбекистон футболининг эртасини айнан мана шундай кўзлари шижоатга тўлган, матонатли футболчилар тимсолида кўрамиз.
Фильм Ҳожиакбар Жабборов бошчилигидаги ижодий гуруҳ ҳамкорлигида яратилди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
