Монза яқинида туғилиб, «Милан» академиясида камол топган яқин ўтмишнинг истеъдодли ярим ҳимоячиси Деметрио Альбертини 17 ёшида, яъни мавсум-1988/1989да Арриго Сакки бошқарувидаги «россонерлар» сафида дебют қилганди. Шу тариқа «қизил-қоралар» шарафини нақ 14 йил муваффақиятли ҳимоя қилиб, 5 марта скудетто ва 2 марта ЧЛ бош совринини қўлга киритган футболчи клуб тарихида ўчмас из қолдирган чин афсоналар қаторидан жой олди. Айни чоғ «Парма» спорт директори ва Италия футбол федерацияси (FIGC) вице-президенти лавозимларида ишлаётган Альбертини жорий ёзнинг бошида қадрдон жамоасига қайтиши мумкин эди, аммо якунда бу имкониятдан очиқ-ошкора юз ўгирди. Лекин бу унинг «Милан»га бефарқ эканлигини англатмайди. Мана, Деметрио La Gazzetta dello Sport нашри мухбирлари билан суҳбатда ҳам асосан ҳозирги «Милан» ҳақида фикр алмашди.
- Деметрио, «Милан» яқиндагина Са-муэле Риччи билан шартнома тузди. Ушбу трансфер ҳақида нима дея оласиз?
- Шахсий фикримни айтаман, миланликлар ажойиб харидни амалга оширишди. Бу бир неча йил олдин Тоналининг трансферига сарфланган сармояни эслатиб юборди. Риччи учун ҳам хурсандман. Зеро, бундай муҳит, жонкуяр мухлислар, афсонавий стадион ва бой тарихга эга «Милан»дек клубда ўйнаш ҳаммага ҳам насиб этавермайди. Самуэле катта салоҳиятга эга йигит ва умидворманки, «Сан Сиро»да тўп суриш унинг учун буюк мақсад сари бошланғич нуқта сифатида хизмат қилади. Қолаверса, жамоа айни пайт худди Риччидек муайян хусусиятларга эга футболчига роса эҳтиёж сезаётганди.
- Кўпчилик Риччи «Милан»да айнан Альбертини версиясини эслатиб юбораётганини таъкидламоқда. Ўзингизга ҳам шундай туюляптими?
- Самуэленинг ички салоҳиятидан келиб чиқиб айтсам, ҳа. Биласизми, «Милан»даги фаолиятим давомида ҳужум ва ҳимояга бирдек қарашганман. Риччи ҳам худди шундай қилмоқда. Шунингдек, мен узун узатмалардан кўп фойдаланардим. Риччи эса ўйин суръатига қараб, оқилона қарорлар чиқариши билан ажралиб туради.
- Альбертини ҳам янги мавсумда Лука Модричнинг персонал мухлислари қаторига қўшилса керак-ов...
- Албатта. Модрич ўйинига қанақасига бефарқ қараш мумкин? Мутлақо ишончим комил, Лука жамоадаги энг тажрибали футболчи сифатида ёш иқтидорларга беминнат ёрдам бериши баробарида ижобий натижаларга муносиб ҳисса қўшади. Эшитишимча, Модрич «Милан» таклифини қабул қилишдан олдин раҳбарият олдига кучли таркиб шакллантириш шартини қўйибди. Шунинг ўзи у ҳали-ҳамон катта муваффақиятлардан умидвор эканлигини кўрсатмоқда. Ўз тажрибамдан яхши биламан, бу каби футболчилар жамоа руҳиятида алоҳида ролга эга бўлишади ҳамиша.
- Лекин Модричнинг паспортига қарасак, у 39 ёшда...
- Менимча, замонавий спортда ёш кўп нарсани ҳал қилмайди. Тўғри, аксарият ҳолларда испанча футболдан бошқа услубга бирдан кўникиш қийинроқ. Мана, асосий муаммо қаерда? Лекин «Олтин тўп» соҳибининг «Милан» учун ҳам муҳим «фигура»га айлана олишига заррача шубҳам йўқ. Зеро, у кийиниш хонасида етарлича мотивацион нутқларни тинглаган ҳамда майдонда энг оғир ва муҳим дақиқаларда ўйинни қандай бошқаришни яхши билади. Хуллас, ўйлайманки, Фофана, Риччи ва бошқа ярим ҳимоячилар Лука билан елкама-елка тўп суриш орқали керакли тажриба тўплаб боришади. Қисқаси, «Милан» муносиб футболчини ўз сафига тортди.
- «Милан» қолган позицияларга ҳам кучли ижрочиларни жалб қилишни ўйламоқда...
- Трансферлар ойнаси ёпилишига ҳали вақт бор. Агар жамоа аввалги мевқеини тиклашни астойдил хоҳламаганида, Модрич ёки Аллегридек футбол дарғалари хизматига мурожаат қилмасди. Демоқчиманки, жамоа ҳали юқори даражали харидларни амалга оширишда давом этади.
- Келинг, энди Аллегри ҳақида гаплашайлик. Агар сиз клуб директори бўлганингизда, уни «Милан»га қайтарармидингиз?
- Албатта, чунки Макс бугунги кунда клубга таклиф қилиш имкони бор барча мураббийлар орасида энг муваффақиятлиси ва тажрибалиси эди. Бундан ташқари, у «Милан» руҳиятини керагидан ортиқ даражада ҳис қиладиган мутахассисдир. Тўғри, бунга қадар икки буюк мураббий - Сакки ва Капеллонинг Миланеллога қайтишлари у қадар омадли чиқмаган. Нима бўлишидан қатъий назар, Аллегри ажойиб мавсум ўтказиш учун барча хислатларга эга. Ўйлайманки, у жамоа билан ҳали муҳим натижалар қайд қилиш ва юқори марраларни забт этишга қодир.
- Дейлик, скудеттони ҳам назарда тутяпсизми?
- «Милан»нинг катта амбициялари ҳеч қачон сўнмайди. Жамоа евротурнирларда ҳам фақат ва фақат юқори марраларни кўзлашга одатланган. Эътиборлиси, «Милан» бу йил сифатли трансферлар бўйича «Интер» ва «Ювентус»ни яққол ортда қолдирмоқда. Қўшимчасига янги харидларни расмийлаштириш учун ҳали вақт етарли.
- Хўш, «Милан»дан яна қандай харидлар кутяпсиз? Масалан, кучлироқ «9-рақам» вариантига нима дейсиз?
- Ҳа, «россонерлар»га бундай тоифага мансуб футболчи ниҳоятда зарур. Чунки юқори марраларни кўзлаган жамоа доимий равишда гол урадиган ҳужумчига эҳтиёж сезади. Айтганча, Сантьяго Хименесни февраль ойидан буён кузатяпман ва унинг жамоага ҳали кўп наф келтиришига ишонаман. Бироқ яна бир кучли марказий ҳужумчи керак, барибир.
- Балки Влаховични олиб келиш керакдир...
- Муносиб номзод. Лекин Влахович ҳозир ҳам «Фиорентина»да намойиш қилган ўйинини кўрсатаётган бўлганидами, кўзларим юмилган ҳолда, уни ўз жамоамга олардим. Такрорлайман, кўзларим ёпиқ ҳолда.
- Ахир Душан «Ювентус»да энди тажриба орттиряпти-ку...
- Влаховичнинг Туринда тобора шаклланаётгани борасида бироз шубҳам бор. Тўғри, ҳозир у билан нималар содир бўлаётганини билмайман, аммо назаримда, жамоасини ўзгартирмоқчидек. Ишончим комил, бундай сифатга эга футболчилар ўзлари учун қулай шароитда нималарга қодир эканликларини тўлиқ исботлай олишади. Масалан, «Милан»да. Лекин афсуски, одатда марказий ҳужумчилар учун жуда кўп пул сўрашади ёки уларни сотишмайди. Чунончи, бундай тоифадаги футболчилар кўп эмас.
- Бу орада Камарда «Лечче»га йўл олди, албатта, кўпроқ ўйин амалиёти олиш учун...
- Ихтиёр менда бўлганида, бу йигитчага имконият бериб кўрардим. Мана, бошқа лигалар, хусусан, Ла Лигада ёшларга кенг йўл очиб беришмоқда. Испаниядан жаҳон даражасидаги футболчилар кўп чиқишаётгани шунга ҳам боғлиқ. Биз эса иқтидорли ёшларни ижара келишуви асосида камтарроқ клубларга юборишга ўрганиб қолганмиз. Ваҳоланки, барча грандларда ёш истеъдодларни 10-15та ўйинда чинакамига синаб кўриш имконияти йўқ эмас.
Манба: acmilanfan.ru, Х.ЮСУПОВ тайёрлади
