«Atletiko» rahbari La Liga hakamlarini tanqid qildi

«Atletiko» bosh direktori Migel Anxel Xil Ispaniya La Ligasi 30-turidan o‘rin olgan jamoalar o‘rtasidagi uchrashuvda (1:2) «Barselona» himoyachisi Jerar Martinga ko‘rsatilgan qizil kartochkaning bekor qilinishini keskin tanqid qildi.

«Ushbu kadrlarni ko‘rganimizda va federasiya e’lon qilayotgan audioyozuvlarni tinglaganimizda, bu faqat uyat tuyg‘usini uyg‘otadi. Hakamlar ham xuddi o‘yinchilar, murabbiylar va rahbarlar kabi o‘yin paytida xato qilish huquqiga ega, ammo maydondagi xatolar — bu shunchaki xatolar. VAR hakami bosh hakam vaziyatga baho berib bo‘lganidan keyin uning qaroriga ta’sir o‘tkazishi esa boshqa masala. VAR faqat shubhasiz xatolarni tuzatish uchun aralashishi kerak, bosh hakam o‘rniga qaror qabul qilishi kerak emas.

Bir xil vaziyatlarda turlicha qarorlar qabul qilinishi, mezonlarning o‘zgarib turishi va biz nimaga tayanishni tushunmayotganimiz normal holat emas. Bu oxirgi ikki turda biz bilan sodir bo‘ldi. Bunda mantiq yo‘q», — deya Xilning so‘zlarini keltirmoqda Marca.

Uchrashuvning 46-daqiqasida kataloniyaliklar himoyachisi to‘pni egallab olishga harakat qilayotganda, «Atletiko» yarim himoyachisi Tyago Almadaning oyog‘iga butsasining tishlari bilan zarba bergan edi. Hakam Mateo Buskets Ferrer VAR’ni ko‘rgandan so‘ng, futbolchi bundan oldin to‘p bilan o‘ynagan deb topdi va avvalroq ko‘rsatilgan qizil kartochkani bekor qildi. Keyinchalik hakam va VAR o‘rtasidagi ushbu qaror bo‘yicha suhbatlar e’lon qilindi.