Karrager Salohni kelasi mavsum «Liverpul» tarkibida ko‘rmayotganini aytdi

«Liverpul»ning sobiq himoyachisi Jeymi Karrager Muhammad Salohning «Liverpul»dagi kelajagi haqida fikr bildirdi.

«Men Muhammad Salohni kelasi mavsum “Liverpul” tarkibida ko‘rmayapman. Men uchun asosiy savol — uni joriy chempionat oxirigacha jamoada ko‘ramizmi-yo‘qmi. Menimcha, u ketsa, juda afsuslanadi.

Ochig‘ini aytganda, uning Arne Slot bilan kelishmovchiligi bor. Ammo murabbiyning harakatini alohida ta’kidlamoqchiman. U Salohni “Brayton”ga qarshi o‘yin uchun qaydnomaga umuman kiritmasligi ham mumkin edi, biroq jamoa manfaatini hammasidan ustun qo‘ydi. Natijada Saloh maydonga tushdi va jamoaga yordam berdi.

Men Salohning “Real” yoki “Barselona”ga o‘tishiga ishonmayman. Bu yerda gap faqat Saudiya Arabistoni ligasi haqida ketishi mumkin. Shu bilan birga, mavsumning ikkinchi yarmida “Liverpul” Angliya Kubogi yoki Chempionlar ligasi finaligacha yetib borishi mumkin. Tasavvur qiling, Saloh Saudiya Arabistonida o‘tirib, sobiq jamoasi Budapeshtda Chempionlar ligasi finaliga chiqqaniga guvoh bo‘lyapti.

U hurmat yo‘lagiga, tribunalardagi bannerlarga va oilasi bilan birga maydonga chiqish imkoniyatiga loyiq. Murabbiy bilan bo‘lgan kelishmovchilikni biroz chetga surib, “Liverpul”da qolishi mumkin bo‘lgan yana uch-to‘rt oy haqida o‘ylab ko‘rish kerak», — deya Karragerning so‘zlarini keltiradi Sky Sports.

Eslatib o‘tamiz, joriy mavsumda misrlik futbolchi APLda 14 ta o‘yinda maydonga tushib, 4 ta gol va 3 ta golli uzatma muallifi bo‘lgan.