Stiven Jerrard mendan ko‘ra kuchliroq — Pol Skoulz

“Manchester Yunayted”ning sobiq yarim himoyachisi Pol Skoulz “Liverpul”ning sobiq sardori Stiven Jerrardni o‘zidan ko‘ra kuchliroq futbolchi ekanini ta’kidladi. Skoulz bu fikrini Jerrard “Liverpul” jamoasining markaziy figurasi sifatida maydonga tushgani, o‘zi esa “Manchester Yunayted”dek buyuk jamoaning bir qismi bo‘lganini aytib izohladi.

“Skoulzmi yoki Jerrard? Albatta, Jerrard. U o‘yin taqdirini hal qila oladigan, yanada atletik futbolchi edi. U o‘ynagan jamoada doimo yetakchi bo‘lishi shart edi, men esa katta jamoaning bir bo‘lagi edim, xolos. Tushunyapsizmi? Men “Liverpul”da Stiven Jerrard qilgan ishlarni qila olmasdim”, — deydi Skoulz The Touchline nashriga bergan intervyusida.

Ma’lumot uchun, Stiven Jerrard faoliyati davomida hech qachon Angliya Premyer Ligasi (APL) chempionligini qo‘lga kiritmagan.

Avvalroq FourFourTwo nashri Angliya Premyer Ligasining eng yaxshi yarim himoyachilari reytingini e’lon qilgan bo‘lib, unda Pol Skoulz Kevin de Bruyne, Stiven Jerrard va Frenk Lemparddan keyin 4-o‘rinni egallagan.

Skoulz butun futbolchilik faoliyati davomida Angliyaning “Manchester Yunayted” klubida to‘p surgan. Klub safida 718 ta rasmiy o‘yinda maydonga tushib, 25 ta sovrinni qo‘lga kiritgan. Ular orasida APLning 11 ta chempionlik unvoni ham bor bo‘lib, bu ko‘rsatkich angliyalik futbolchilar orasida rekord hisoblanadi. U uzoq masofadan aniq zarbalari bilan tanilgan, maydonni nozik his qilishi hamda qisqa va uzoq paslardagi yuqori texnikasi bilan ajralib turgan. Ko‘plab mutaxassislar tomonidan so‘nggi 20 yilning eng yaxshi markaziy yarim himoyachisi sifatida e’tirof etilgan.

Skoulz yetti yil davomida Angliya terma jamoasi safida o‘ynagan. U to‘rtta yirik musobaqada ishtirok etgan: 1998 va 2002 yilgi jahon chempionatlari hamda 2000 va 2004 yilgi Yevropa chempionatlari. Yevro–2004 musobaqasidan so‘ng Skoulz terma jamoadagi faoliyatini yakunlaganini e’lon qilib, bunga klubdagi faoliyatiga ko‘proq e’tibor qaratish va oilasi bilan ko‘proq vaqt o‘tkazish istagini sabab qilib ko‘rsatgan.

2011 yil 31 may kuni u futbolchilik faoliyatini yakunlashga qaror qilgan. Biroq 2012 yil 8 yanvarda Pol Skoulz 2011/12 yilgi mavsum oxirigacha futbolchi sifatida “Manchester Yunayted”ga qaytgani e’lon qilindi. Keyinchalik u klub bilan shartnomasini 2012/13 yilgi mavsumga uzaytirdi. 2013 yil may oyida esa faoliyatini rasman yakunladi.