Diogu Jota xotirasiga bag‘ishlangan kitob chop etildi

Portugaliyalik hujumchi, Diogu Jota hayotiga zomin bo‘lgan fojiali yo‘l-transport hodisasidan o‘n oy o‘tib, uning so‘nggi kunlari yana jamoatchilik e’tiboriga qaytdi.

Goal nashri xabariga ko‘ra, yangi chop etilgan biografiya futbolchining hayotidagi eng og‘ir sahifalarni ochib berar ekan, bu voqeaga yana bir bor insoniy, emosional nigoh bilan qarashga majbur qiladi.

Portugaliyalik jurnalist Joze Manuel Delgado tomonidan yozilgan “U hech qachon qaytmaydi... Juda uzoq vaqt” nomli kitobda Jotaning hayotining so‘nggi soatlari batafsil tasvirlangan. Asarda uning rafiqasi Rute Kardoso tomonidan halokatdan bir necha soniya oldin yuborilgan, ammo futbolchiga yetib bormagan xabar ham keltiriladi.

U xabarda shunday yozilgan edi:

“Azizim, to‘xtaganingda menga qo‘ng‘iroq qil, senga ko‘rsatmoqchi bo‘lgan narsam bor”.

Bu oddiy jumla ortida esa katta fojia yashirin edi. Ruti o‘sha paytda yangi olingan to‘y videosini ulashmoqchi bo‘lgan. Ammo bu xabar Jotaga yetib bormadi.

28 yoshli futbolchi halokatdan atigi 11 kun oldin Portu shahrida ayoli bilan turmush qurgan edi. Shifokorlar o‘pkasidagi jarrohlikdan so‘ng unga uchishni taqiqlagach, u Angliyaga avtomobil orqali yo‘l olishga qaror qiladi.

Fojia Ispaniya shimolidagi yo‘lda sodir bo‘lgan. Quvib o‘tish paytida avtomobil shinalaridan biri yorilib ketgan. Futbolchi boshqaruvni yo‘qotib, yo‘ldan chiqib, butunlay yonib ketgan. Diogu Jota va uning ukasi Andre Silva voqea joyida halok bo‘lgan. Dastlabki surishtiruvlarga ko‘ra, yuqori tezlik ham halokat sabablaridan biri bo‘lishi mumkin.

Bu xabar futbol olamida katta qayg‘u bilan qarshi olindi. “Liverpul” klubi, uning jamoadoshlari va millionlab muxlislar Jotani nafaqat yuqori saviyadagi futbolchi, balki kamtarin va samimiy inson sifatida yodga olishdi.

Biografiyada futbolchining shaxsiyati ham alohida ochib beriladi. Rafiqasining so‘zlariga ko‘ra, Jota mashhurlikka qaramay oddiy hayotni afzal ko‘rgan, bo‘sh vaqtini esa oilasi bilan, e’tibordan yiroqda o‘tkazishni yaxshi ko‘rgan.

Kitobda uning ota-onasi bilan bog‘liq og‘ir xotiralar ham bor. Otasi Joakim Jota o‘sha kechada kelinidan kelgan xavotirli qo‘ng‘iroqni eslaydi. Onasi Izabel Jota esa o‘g‘illaridan javob bo‘lmagan lahzalarda ichki qo‘rquvni his qilganini aytadi.

Muallifning ta’kidlashicha, ushbu kitobni yozishdan maqsad faqat futbolchining faoliyatini hujjatlashtirish emas, balki uning insoniy qiyofasini, sokin va kamtar hayot tarzini abadiylashtirishdir.

“Ehtimol, bu voqeaning eng og‘ir ramzi yetib bormagan o‘sha oddiy xabar — yarim yo‘lda qolib ketgan muhabbatning so‘nggi so‘zlari”, deyiladi Goal nashri maqolasida.

Diogu Jotaning fojiali o‘limi sport olamidagi navbatdagi yo‘qotish bo‘lishdan ko‘ra kengroq ma’noga ega. Bu katta orzular, muhabbat va hayotning bir lahzada uzilib qolishi haqidagi hikoya.