Gvardiola klublar o‘rtasidagi JCH bilan terma jamoalar musobaqalari o‘rtasidagi o‘xshashlik haqida gapirdi

«Manchester Siti» bosh murabbiyi Xosep Gvardiola klublar o‘rtasidagi jahon chempionati guruh bosqichi doirasida «Yuventus»ga qarshi o‘yin arafasida musobaqani terma jamoalar ishtirokidagi turnirlar bilan taqqosladi va Turin klubi ustidan qozoniladigan g‘alabaning ahamiyatini ta’kidladi.

«Biz bu haqda gaplashdik — bu turnirda yetti uchrashuv bo‘ladi, xuddi jahon chempionati, Yevropa chempionati yoki Amerika Kubogi kabi. Bunday formatda taktika muhim, lekin unchalik ham emas.

Ular ["Yuventus"] ehtimol, bizdan yaxshiroq o‘ynayapti. Ammo biz guruhda birinchi o‘rinni egallashni istasak, ularni yengishimiz shart. Agar bunday bo‘lmasa va ikkinchi o‘rinda qolsak, keyingi bosqichda kimga qarshi o‘ynashimizni ko‘ramiz», — degan Gvardiolaning so‘zlarini «Manchester Siti»ning rasmiy sayti keltirdi.

«Manchester Siti» va «Yuventus» o‘rtasidagi o‘yin 26 iyun kuni Floridadagi «Kemping Uorld» stadionida bo‘lib o‘tadi. Jamoalar klublar o‘rtasidagi jahon chempionati G guruhida ikki turdan so‘ng peshqadamlik qilmoqda. Hozircha «Yuventus» ko‘proq gol urgani uchun birinchi o‘rinda turibdi — ular «Vidad» va «Al-Ayn»ni umumiy 9:1 hisobi bilan mag‘lub etgan. «Manchester Siti» esa ushbu jamoalarni 2:0 va 6:0 hisoblarida yenggan.