Shirer Sheshkoning «Liverpul» darvozasiga qo‘l bilan urgan goli haqida gapirdi

«Nyukasl» va Angliya terma jamoasining sobiq hujumchisi Alan Shirer Benyamin Sheshkoning «Liverpul» darvozasiga urgan goli borasida o‘z fikrini bildirdi. «Manchester Yunayted» futbolchisi APLning 35-turi doirasidagi bahsda raqib darvozasini ishg‘ol qildi va ushbu uchrashuv uning jamoasining 3:2 hisobidagi g‘alabasi bilan yakunlandi.

Zarbadan oldin futbolchi to‘pga qo‘li bilan yengil tegib ketgani sababli, bu gol qizg‘in bahslarga sabab bo‘ldi. IFAB qoidalariga ko‘ra, agar hujumchi golni qo‘li bilan ursa yoki to‘p qo‘lga tekkanidan so‘ng darhol darvozaga yo‘llansa, hatto bu tasodifan sodir bo‘lgan bo‘lsa ham, gol bekor qilinishi kerak. Shunga qaramay, VAR hakamlari uzoq davom etgan tekshiruvdan so‘ng golni inobatga olishga qaror qilishdi.

«Men bunday gollar bekor qilinishini xohlamayman. To‘g‘risini aytsam, qo‘l bilan o‘ynash borasidagi qoidalarni, xususan, mana shu qoidani ham mutlaqo mantiqsiz deb hisoblayman. Lekin izchillik va qoidalarning to‘g‘ri qo‘llanishi haqida gapiradigan bo‘lsak, to‘p uning qo‘liga tegdi. To‘p Sheshkoning chap qo‘liga tekkani sababli uning harakat yo‘nalishi o‘zgarganini ko‘rish mumkin. Bu shunchaki yengil teginish edi, ammo agar qoidalarga amal qilinsa, bu gol bekor qilinishi kerak edi», — deya Shirerning so‘zlarini keltiradi Daily Star.

Ayni damda «Manchester Yunayted» uchinchi, «Liverpul» esa to‘rtinchi o‘rinni egallab turibdi.