Kerrik «Manchester Yunayted»dan yangi shartnoma kutmoqda

Maykl Kerrik “Manchester Yunayted” bilan rasmiy muzokaralar o‘tkazilishini kutmoqda va u bosh murabbiy lavozimiga asosiy nomzodlardan biri bo‘lib turibdi. Bu haqda jurnalist Ben Jeykobs o‘zining X ijtimoiy tarmog‘idagi sahifasida xabar berdi.

Qayd etilishicha, “Manchester Yunayted” bir nechta nomzodlar bilan suhbat o‘tkazishni rejalashtirgan. Bu sinchkovlik bilan olib borilayotgan saralash jarayonining bir qismidir. Jamoaning UYEFA Chempionlar Ligasiga yo‘llanma olishi bu rejaga ta’sir qilmaydi.

Jamoaning bir qator yetakchi futbolchilari, jumladan, Bruno Fernandesh, Mateus Kunya va Harri Maguayr Kerrikning ushbu lavozimda qolishi kerakligini bildirgan. Shuningdek, u keyingi mavsum uchun futbolchilar tanlash bo‘yicha o‘tkazilayotgan yig‘ilishlarda ham ishtirok etmoqda. Avvalroq “Manchester Yunayted” bu jarayonga Tomas Tuxelni jalb qilishni rejalashtirgan edi, biroq Angliya terma jamoasi bosh murabbiyi shartnomasini uzaytirdi.

Ma’lumot uchun, Kerrik 2026 yilning yanvar oyida “Manchester Yunayted”ni qabul qilib olgan edi. O‘tgan vaqt davomida jamoa APLda 14 ta o‘yin o‘tkazib, 10 ta g‘alaba va 2 ta durangga erishdi. Ayni damda klub Angliya Premyer Ligasi turnir jadvalida 35 o‘yindan so‘ng 64 ochko jamg‘argan holda uchinchi o‘rinni egallab turibdi. “Qizil iblislar” kelasi mavsum YECHLda ishtirok etishni kafolatlagan.