«Manchester Yunayted» Chempionlar ligasiga yo‘llanma olgani uchun qancha mablag‘ ishlab olishi ma’lum bo‘ldi

Angliya Premyer-ligasining 35-turida «Liverpul» ustidan qozonilgan g‘alabadan so‘ng, «Manchester Yunayted» kelasi mavsum uchun Chempionlar ligasi yo‘llanmasini naqd qildi. «Qizil iblislar» 64 ochko jamg‘arib, jadvalda beshinchi o‘rindan pastga tushmasligini kafolatladilar, bu esa Yevropaning eng nufuzli klublar turnirida ishtirok etish imkonini beradi.

Sky Sports nashrining xabariga ko‘ra, «Manchester Yunayted» Chempionlar ligasiga kvalifikasiyalangani uchun 80 million funt sterlingdan ko‘proq mablag‘ oladi. Bu klubning yozgi transferlari uchun jiddiy moliyaviy turtki bo‘ladi.

Ushbu summa quyidagilarni o‘z ichiga oladi:

Guruh bosqichidagi ishtirokdan keladigan daromad — taxminan 70 million funt;

Adidas kompaniyasidan beriladigan bonus — 10 million funt.

Agar jamoa turnirda yanada ilgarilab borsa, yana 20 million funtdan ortiq mablag‘ ishlab olishi mumkin. Qayd etilishicha, bu mablag‘lar «Manchester Yunayted» uchun transfer bozorida yangi futbolchilarni sotib olishda katta ta’sir ko‘rsatadi.