OCHL. «Paxtakor» guruh bosqichining qolgan o‘yinlarini Toshkentda qabul qilishi mumkin

Osiyo Chempionlar Ligasi "B" guruhining qolgan barcha o‘yinlari Toshkentda o‘tkazilishi mumkin. Agar guruh a’zolari rozi bo‘lsa va «Paxtakor» mezbonlik qilish istagini bildirsa. Bu haqda jurnalist Bobur Akmalov o‘zining telegramdagi kanali orqali xabar tarqatdi.

«Paxtakor» rasmiy sayti xabariga ko‘ra, OFK Chempionlar ligasining 2020 yilgi bahslari davom etishi bo‘yicha klublar va milliy assosiasiyalarga xat yo‘lladi.

Unga ko‘ra, ko‘rib chiqilgan va muhokamada bo‘lgan uch variantdan eng qulayi sanalgan markazlashgan format tanlab olindi. Guruh bosqichi uchrashuvlari bir mamlakatda davom ettiriladi. Klublar va milliy assosiasiyalar taklifi asosida OFK guruh bahslarini ma’lum mamlakatga topshiradi. Ushbu o‘yinlarning avgust oyidan avval o‘tmasligi belgilangan. Chunki mintaqamizda yoz fasli harorati avgustdan oldin futbol o‘ynashga katta qiyinchilik tug‘diradi.

«Paxtakor» mezbonlikka rag‘bat bildirsa, biz 2002 yilgi OCHLda bo‘lgani kabi 4 jamoaning o‘zaro o‘yinlariga guvoh bo‘lishimiz mumkin.

Esingizda bo‘lsa, o‘shanda «Paxtakor» Iroqning "At-Talaba" jamoasini va Turkmanistonning "Nisa" klubini bir xil – 3:0 hisobida, Eron grandi "Piruzi" jamoasini esa Mirjalol Qosimovning burchakdan pasini golga aylantirgan Anvar Soliyev zarbasi evaziga mag‘lub etgandi.

O‘shanda «Paxtakor» stadioni 55.000 tomoshabinni o‘z bag‘riga sig‘dirgan, o‘sha mavsumda klub yarim finalgacha borgan, yil yakunida Osiyoning eng yaxshi klubi, deb topilgandi.