O‘zbekiston Kubogi-2025 finali oldidan qiziqarli faktlar

"Paxtakor" o‘z tarixida 18-marta O‘zbekiston Kubogi finalida o‘ynaydi.

"Sherlar" kubok finallarida eng ko‘p ishtirok etgan jamoa sanaladi. Andijondagi final "Sherlar" uchun 18-hal qiluvchi bahsga aylanadi. Ulardan 13tasida jamoa kubok sohibiga aylangan. "Bunyodkor" va "Nasaf" 9, "Neftchi" 7 bor finallarda maydonga tushgan. Finalda ketma-ket uchta to‘qnashuv "Paxtakor" va "Bunyodkor" o‘rtasida 2007, 2008 va 2009 yillarda, so‘ng 2018, 2019 va 2020 yillarda "Paxtakor" va OKMK o‘rtasida kuzatilgan. Finallarda eng ko‘p kuzatilgan qarama-qarshilik "Paxtakor" va "Neftchi" o‘rtasida ro‘y bergan. Bu jamoalar jami 5 marta O‘zbekiston Kubogi finallarida bahs olib borishgan. "Paxtakor" - "Bunyodkor", "Paxtakor" - OKMK, "Paxtakor" - "Nasaf" va "Bunyodkor" - "Nasaf" esa uchtadan finallarda ro‘para kelgan.

Ketma-ket finallarda ishtirok etish bo‘yicha rekord "Paxtakor"ga tegishli. Jamoa 2001 yildan 2009 yilgacha 9 finalda qatorasiga maydonga tushgan! Ikkinchi natija "Bunyodkor"ga tegishli bo‘lib, bu klub 2007-10 yillarda qatorasiga 4 finalda o‘ynagan.

Murabbiylar orasida ketma-ket uch finalda jamoasi bilan ishtirok etgan mutaxassislar orasiga Aleksandr Ivankov, Yuriy Sarkisyan, Ravshan Haydarov, Shota Arveladze va Ro‘ziqul Berdiyev kirgan. Eng ko‘p finallarda jamoasi bilan qatnashgan murabbiy Mirjalol Qosimov sanaladi. Qosimov "Bunyodkor" va OKMK klublari bilan 8 finalda ishtirok etgan. Yuriy Sarkisyan "Neftchi" bilan 7 marta final ishtirokchisiga aylangan. Hozirgacha xorijlik mutaxassislardan Leonid Ostroushko, Sergey Butenko, Tachmurod Agamurodov, Ziko, Shota Arveladze va Aleksandr Xomyakov O‘zbekiston Kubogida zafar quchgan.

"Paxtakor" va "Buxoro" finallarda birinchi bor to‘qnash keladigan O‘zbekiston Kubogi-2025 finali 29 oktyabr kuni Andijondagi "Bobur Arena" stadionda soat 18:30da boshlanadi.