Igor Sergeev faoliyatini “Sepahon” klubida davom ettiradi

O‘zbekiston milliy terma jamoasi va “Paxtakor” hujumchisi Igor Sergeev klubni tark etib, Eronning “Sepahon” jamoasi bilan shartnoma imzolashi kutilmoqda. Bu haqda jurnalist Narzulla Saydullayev o‘zining Telegram kanalida ma’lum qildi.

Ma’lumot uchun, Sergeev Superliganing 2025 yilgi mavsumi to‘purari bo‘ldi. 32 yoshli futbolchi chempionat davomida 20 ta gol hamda 2 ta golli uzatma muallifiga aylandi.

E’tiborlisi, Igor Sergeev oradan 10 yil o‘tib, yana Superliga to‘purari bo‘lishga muvaffaq bo‘ldi. U 2015 yilda 24 ta gol bilan mavsumning eng yaxshi to‘purari sifatida e’tirof etilgandi.

Futbolchi faoliyati davomida 5 karra O‘zbekiston chempioniga aylangan. Shuningdek, u “Paxtakor” bilan 3 marta O‘zbekiston kubogini ham qo‘lga kiritgan. Keyinchalik, faoliyatini Qozog‘istonning “Tobol” klubida davom ettirgan va ushbu jamoa bilan mamlakat chempionati va kubogida g‘alaba qozongan.

Ayni vaqtda, Eron Pro ligasida 3 nafar o‘zbekistonlik futbolchi — Jaloliddin Masharipov (“Istiqlol”), Oston O‘runov (“Persepolis”) va Odiljon Hamrobekov (“Traktor”) faoliyat yuritmoqda.

Transfermarkt nashri ma’lumotlariga ko‘ra, Igor Sergeevning ayni vaqtdagi transfer narxi 1,2 million yevroni tashkil etadi.

“Sepahon” klubi Eron Pro ligasining joriy mavsumida 14 ta o‘yindan so‘ng 30 ochko jamg‘argan va musobaqa peshqadami bo‘lib turibdi.