“Bu ishni pul uchun qilmadim” — Sherzod Nasrullayev “Nasaf”dan ketishiga izoh berdi

O‘zbekiston terma jamoasi himoyachisi Sherzod Nasrullayev “Nasaf”ni tark etib, Toshkentning “Paxtakor” klubi bilan shartnoma imzoladi. Futbolchi vaziyatga izoh berar ekan, klubni pul uchun klubni tark etmaganini bildirdi.

“Olti yildan beri ‘Nasaf’da o‘ynayman. Ko‘pchilik pul uchun boshqa klubga o‘tganimni aytmoqda. Rostini aytsam, bu ishni pul uchun qilmadim. Shunchaki, karyeramda o‘zgarish qilishni istadim. Qolaversa, mening ketishim, ‘Nasaf’da boshqa futbolchilarning o‘sishiga ham yordam beradi. Chunku klubda yosh futbolchilar ko‘p. Xudo xohlasa, ‘Nasaf’ga qachondir  yana qaytaman”, deydi 27 yoshli futbolchi.​

Ma’lumot uchun, Sherzod Nasrullayev “Nasaf” tarbiyalanuvchisi bo‘lib, 2019-yildan beri klubning asosiy jamoasi safida harakat qilib keladi. Futbolchi hozirga qadar “ajdarlar” safida 200 ta uchrashuvda ishtirok etib, 12 ta gol va 35 ta golli uzatma muallifiga aylangan. Futbolchi 2025-yilgi mavsum yakunida Qarshi klubini tark etib, “Paxtakor” bilan shartnoma imzoladi. Uning “sherlar” bilan shartnomasi 2027-yilning oxirga qadar amal qiladi. Transfermarkt portali himoyachining qiymatini 1,2 million yevroga baholagan.