"Paxtakor" birinchi o‘yinini o‘tkazganiga 70 yil to‘ldi

1956 yil 8 aprel kuni "Paxtakor" o‘zining ilk rasmiy uchrashuvida maydonga tushgan.

1951 yil Toshkentda "Paxtakor" qishloq sport jamiyati tashkil etilgan, ammo futbol jamoasi sifatida faoliyatini "Paxtakor" 1956 yil yanvar oyidan boshlagan. Murabbiylikka "Dinamo" Moskvadagi ishi bilan tanish bo‘lgan taniqli mutaxassis Valeriy Bextenev taklif etilgan. 1955 yil Odessada bo‘lib o‘tgan qishloq jamoalari o‘rtasida Sobiq Ittifoq birinchiligida "Paxtakor" qatnashgan. Chempionatlardagi ilk rasmiy uchrashuvi esa 1956 yil 8 aprel sanasiga to‘g‘ri kelgan.

Dastlabki uchrashuvlarini O‘zbekistonning bosh jamoasi Toshkentning eski shahar qismida joylashgan "Spartak" stadionida o‘tkazgan. Chunki ayni paytda yurtimizning bosh arenasiga aylangan "Paxtakor" stadioni 1956 yilning avgust oyida ishga tushirilgan.

Birinchi rasmiy bellashuv ikkinchi liganing "B" klassi doirasida 1956 yilning 8 aprel kuni o‘tkazilgan. Unda Perm viloyatining Molotov shahri jamoa bilan to‘qnash kelgan "Paxtakor" 1:0 hisobida g‘alaba qozongan. O‘yin qaydnomasi bilan tanishing:

"Paxtakor" - Perm shahri jamoasi - 1:0 (1:0). "Spartak" stadioni.
Gol: Laziz Maqsudov, 44-pen.
"Paxtakor": Pyotr Volostnov, Akmal Azizxo‘jayev, Anatoliy Kozenkov, Vitaliy Vitkalov, Idgay Tazetdinov, Qobil Muqimov, Yakov Kaprov, Laziz Maqsudov, Vladimir Kanunnikov, Aleksandr Murashov, Mixail Borkin.

Hozirga kelib "Paxtakor" 16 marta O‘zbekiston chempionatida va 14 bor O‘zbekiston Kubogida, ikki bor O‘zbekiston Superkubogi, bir martadan MDH Kubogi va Liga Kubogida zafar quchib, mamlakatimizning eng sovrindor jamoasiga aylangan. Chempionlar Ligasida ishtirok etish bo‘yicha Osiyo rekordchilaridan biri sanaladi. Jamoa OCHLda ikki marta yarim finalda o‘ynagan.

Eslatma: Surat 1956 yilga tegishli.