Энг қиммат “қариялар” (топ 10)
Stadion.uz футбол тарихидаги энг қиммат қариялар билан таништириб ўтади. Эътиборлиси улар орасида “Бунёдкор” футболчиси ҳам мавжуд.
Найжел Мартин – “Эвертонга” (800 минг евро)
33 ёшида “Кристал Пелас” жамоасининг асосий дарвозабони бўлган футболчи “Лидс”га ўтади ва 6 мавсум клуб шарафини ҳимоя қилади. Англия терма жамоаси сафида 20 та ўйин ўтказган Мартинни ёш ва иқтидорли Пол Робинсон асосий таркибдан чиқариб юборгач, 2002-йилда “Эвертон” 800 минг евро эвазига уни сотиб олади.
Грегори Купе – ПСЖ (800 минг евро)
Купе узоқ йиллар давомида “Лион” шарафини муносиб ҳимоя қилди. Фақат 34 ёшга келибгина жамоасини алмаштириш мақсадида Францияни тарк этади ва “Атлетико” сафига бориб қўшилади. Афсуски, рақобатда мағлуб бўлган Купени “матрасчилар” бир мавсумдан сўнг Париж клубига сотиб юборишдан бошқа чора топа олмайди.
Стив Боулд – “Сандерленд” (800 минг евро)
“Арсенал” шарафини 11 йил давомида муносиб ҳимоя қилган футболчини “Сандерленд” катта умидлар билан сотиб олган эди. Жамоа тажрибали ҳимоячини ўйновчи мураббийга айланишини таҳмин қилган бўлсада, якунда Боулд ҳеч қандай наф бергани йўқ. Ёш ва кучга тўлга ҳимоячилар билан рақобатни бой бергач, клуб уни ўйин қайдномасига ҳам киритмай қўйди. Вазиятни тушуниб етган Стив мавсум сўнггида бутсаларини михга илиб юборди. Ваҳоланки, 36 ёшли футболчи учун 1999-йилда (ўша даврлар учун катта сумма) “Сандерленд” 800 минг евродан воз кечган эди.
Ривалдо – “Бунёдкор” (1 миллион евро)
Афсонавий футболчи 30 ёшдаёқ топ жамоалар “назаридан қолишга” улгурган ва пул топиш илинжида дунё кезишга тушиб кетган эди. Тошкентнинг “Бунёдкор” жамоаси 36 ёшли бразилиялик футболчини ўз сафига қўшиб олиш учун 1 миллион евродан воз кечди ва адашмади. Икки ярим мавсум давомида “қалдирғочлар” шарафини ҳимоя қилган Ривалдо 2 бор мамлакат чемпионлигини қўлга киритди ва ўзбек футболи тарихида қолишга муваффақ бўлди. Тан олиш лозим, миллий чемпионатимизда ҳали унинг даражасидаги футболчи тўп сурганича йўқ. Кейинчалик, Ривалдо яна 4 мавсум давомида турли чемпионатларда ўз кучини синаб кўрди ва Бразилияда футбол билан хайрлашди.
Гарет Барри – “Вест Бромвич” (1,1 миллион евро)
“Вест Бромвич” 36 ёшли футболчини 2017 йилда сотиб олган бўлсада, у ҳали-ҳамон асосий таркиб футболчиси бўлиб келмоқда. Афсуски, катта эҳтимол билан Барри билан тузилган шартнома янгиланмайди. Сабаби, бу мавсумда қаҳрамонимиз атиги 3 та ўйинда майдонга тушди холос. Шундай бўлсада, у билан бир нечта қуйи двизион вакиллари қизиқмоқда.
Девид Жеймс – “Портсмут” (1,7 миллион евро)
2006-йилда Жейм 36 ёшни қарши олган, бироқ жуда тажрибали дарвозабонлардан бири эди. Шу сабабли, “Портсмут” унинг трансфери учун “Манчестер Сити”га 1,7 миллион евро тўлашдан бош тортгани йўқ. Барча унинг катта ареналарда бошқа кўринмаслигини таҳмин қилди, бироқ киппер 2008-йилда жамоаси учун Англия лига кубоги ғолиблиги йўлида қаҳрамонлик намойиш этди. Унинг “Портсмут”даги фаолияти энг ёрқин дақиқалар сифатида тарихда қолди. Ачинарлиси шундаки, дарвозабон молиявий муаммолардан чиқиб кетиш учун 45 ёшга қадар спортдан кетгани йўқ. Унинг сўнгги манзили Ҳиндистон чемпионати бўлди.
Налдо – “Монако” (2 миллион евро)
Тан олиш лозим, “Монако” 2019-йилда 36 ёшли ҳимоячи учун 2 миллион сарф этиб таваккалга қўлд урди. Франсузлар унинг тажрибасидан ва иккинчи қаватдаги устунлигидан фойдаланмоқчи эди, бироқ ҳаммаси ачинарли тус олди. Бир мавсум давомида 7 та ўйинда майдонга тушган Налдо 2 бор майдондан четлатилиш билангина мухлислар ёдида қолди. Клуб эса, мавсум сўнггида у билан тузилган шартномани бекор қилишга қарор қилди. Сарф қилинган 2 миллион эса, ҳавога учиб кетди.
Бред Фридел – “Астон Вилла” (2,5 миллион евро)
“Астон Вилла” ҳам 37 ёшли киппер учун 2,5 миллион билан таваккал қилди, бироқ “Монако”дан фарқли ўлароқ бу трансфер омадли келди. 3 мавсум давомида асосий дарвозабон сифатида ҳаракат қилган Фридел ҳар учта ўйиннинг бирида дарвозаси дахлсизлигини сақлаб қолишга муваффақ бўлди ва унинг трансфер нархи икки баробар кўтарилиб кетди. Жамоани эркин агент сифатида тарк этган АҚШ терма жамоаси аъзоси “Тоттенҳем” билан шартнома имзолади ва яна 4 мавсум “шпорлар” ихтиёрида бўлди.
Жак Сангоо – “Мец” (6,5 миллион евро)
Бу трансфер футбол оламидаги энг мантиқсиз пул сарф этиш сифатида тарихда қолиши аниқ. Ўртамиёна жамоанинг 37 ёшли футболчи учун 2001-йилда 6,5 миллион сарф этишини тушуниш қийин. Энг қизиғи шундаки, қария дарвозабон учун бугунги кунда ҳам ҳеч қайси клуб 6,5 миллион сарф этмайди. Афсуски, “Мец” клуби ушбу трансфер ортидан фақат зарар кўрди холос. Камерунлик киппер жамоага келиб қўшилиши билан 2 ой давомида миллий терма жамоаси йиғинида бўлди. Кейин, иккита омадсиз учрашув ва абадий захира ўриндиғидан жой олди. Қаҳрамонимиз 2 мавсум клуб шарафини ҳимоя қилган бўлсада, атиги 12 бор майдонга чиқди холос.
