Игорь асло бўшашма!
Игорь Сергеев Қозоғистон чемпионатидаги навбатдаги голини нишонлади. «Актобе» шарафини ҳимоя қилаётган терма жамоамиз ҳужумчиси бу сафар «Қайсар»га қарши кечган уй учрашуви (1:1)нинг 43-дақиқасида рақиб дарвозасини нишонга олди. Шу билан Сергеевнинг лигадаги голлари сони 7тага етди. Айни пайт Қозоғистон ПЛ тўпурарлар рўйхатида айнан ҳамюртимиз пешқадам бўлиб турибди.
Фақат дуранг... Жанубий Корея «К»-лигаси 16-туридан ўрин олган «Канвон» - «Сувон Сити» ўйинида кучлар тенг келди - 0:0. Мезбонлар ҳимоячиси Рустам Ашурматов бу сафар бошлан-ғич таркибда майдонга тушиб, тўлиқ 90 дақиқа тўп сурди. «Канвон» бир тур олдин «Ульсан Хюндай» билан учрашувнинг 90+3-дақиқада гол қўйиб юбориб, тайёр ғалабани қўлдан чиқарганди - 2:3. Ашурматов ўша учрашувда ҳам тўлиқ вақт ҳаракатланиб, 6-дақиқада сариқ карточка олганди.
Балли, Элдор!
«Женоа» Италия «А» серияси 36-турида «Болонья» меҳмони бўлиб, ортга 2:0 ҳисобидаги ғалаба билан қайтди. Элдор Шомуродов бу учрашувда Генуя клуби вакиллари орасида энг юқори баллга муносиб кўрилди, гарчи гол урмаган бўлсада. Муҳими, у тўлиқ вақт ҳаракатланиб, тиним билмаслиги билан яққол ажралиб турди. Элдор шунингдек, иккинчи бўлим бошида сариқ карточка ҳам олди. Ҳамюртимиз кейинги тур ўйинида «Аталанта» дарвозасини 2 марта нишонга олди, ваҳоланки, у майдонга иккинчи бўлимдагина тушди. Айтиш ўринли, Шомуродов Италияда илк марта «дубл»га эришди. Натижага келсак, «Женоа» якунда 3:4 ҳисобида мағлубиятга учради, барибир. Умуман олганда, охирги 5та ўйинда рақиблар дарвозасига 4 марта йўл топган 25 ёшли ҳужумчимиз «А» сериядаги голлари сонини 7тага етказиб қўйди. Унинг ҳисобида 1та самарали узатма ҳам бор. Табиийки, «Женоа» сафида айнан ҳамюртимиз энг юқори баҳо олди. WhoScored портали унинг ҳаракатини 8 баллга лойиқ кўрди. «Аталанта»дан эса фақат Руслан Малиновский (8,8 балл) ва Дуван Сапата (8,4 балл) Элдордан юқорироқ баҳо олишди. Ҳамюртимиз «Аталанта» билан ўйин якунлагач, клуб матбуот хизматига қисқача интервью бериб, майдонда мураббий кўрсатмаларини тўғри бажаришга уринганини алоҳида таъкидлади:
- Захирадан тушиб, дарҳол гол урдингиз, ўйинга яхши қўшилдингиз...
- Ҳа, майдонда мураббий кўрсатмаларини тўғри бажаришга уриндим, холос.
- «А» сериядаги дебют мавсумида ҳозирча 7та гол. Буни ўйлаганмидингиз?
- Йўқ, лекин ўзимни яхши томондан кўрсатишни ўйлаганим рост.
- Горан Пандев билан бирга ўйнаш ҳақида нима дейсиз?
- Ажойиб. Ундан кўп нарса ўрганиш мумкин, ҳозир шундай қиляпман ҳам.
- Мавсумдаги қайси голингиз хотирангизда алоҳида муҳрланди?
- «Специя» билан баҳсдагиси. Сабаби - ўша ўйинда ғалаба қозонгандик.
Бирида ғалаба, иккисида...
БАА чемпионати 26-тури ҳамюртларимиз клублари учун турлича келди. Таркибида Достон Ҳамдамов ҳаракатланаётган «Хатта» сафарда «Ал-Айн»га қарши майдонга тушиб, 0:1 ҳисобида енгилди. Ҳамюртимиз бу ўйинга 52-дақиқада захирадан қўшилди. Жалолиддин Машарипов ва Одил Ҳамробековнинг клуби - «Шабаб Ал-Аҳли» меҳмонда «Ал-Наср»дан устун келди - 3:2. Бироқ Машарипов ўйин қайдномасидан четда қолди, Ҳамробеков эса 63-дақиқада майдонга тушди. «Ал-Иттиҳод» - «Шаржа» учрашуви (1:0)да эса, меҳмонлар вакили Отабек Шукуров тўлиқ 90 дақиқа ҳаракатланди. Ваҳоланки, олдинроқ миллий жамоамиз ярим ҳимоячисининг «Шаржа» сафида охирги марта майдонга тушгани айтилган эди.
Якшанба куни эса Одил Ҳамробеков ва Жалолиддин Машарипов «Шабаб Ал-Аҳли» сафида БАА Лига кубоги соҳибига айланишди. Мусобақ финалида «Ал-Наср» билан ўйнаган «Шабаб» 2:1 ҳисобида устун келди. Одил ҳам, Жалолиддин ҳам бу ўйинда тўлиқ вақт ҳаракатланишди. «Шабаб Ал-Аҳли»нинг ўз тарихида 10-марта Лига кубоги ғолибига айланганини ҳам айтиш жоиз.
Умаров - гол ассистенти.
Беларусь чемпионати Олий лигаси 9-тури легионерларимиз жамоаларига бирдек омадли келди. Пешқадам «Шахтёр» сафарда «Неман»ни ирода эвазига енгди (2:1), бироқ Шаҳзод Убайдуллаев иштирокисиз. БАТЭ эса ўз майдонида «Рух»ни 3:2 ҳисобида доғда қолдирди. Мезбонлар вакили Шаҳбоз Умаров 59-дақиқагача майдонда ҳаракатланиб, жамоасининг 2-голида ассистентлик ролини бажарди.
«Уфа» қолди, аммо Ўрунов яна сафдан чиқди.
«Уфа» Россия ПЛ охирги турида «Арсенал» (Тула)ни 2:1 ҳисобида енгиш эвазига элитадаги ўрнини сақлаб қолди. Бироқ бу ўйин жамоада ижара келишуви асосида ўйнаётган ҳамюртимиз Остон Ўрунов учун нохуш келди. «Уфа»нинг бошланғич таркибида майдонга тушган терма жамоамиз вакили ўйиннинг биринчи қисми, аниқроғи, 20-дақиқада жароҳатланиб, ўрнини захира футболчисига бўшатиб берди. Остоннинг жароҳати даражаси тиббий текширувдан кейин аниқ бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
