«Бавария» ва «Ливерпул»нинг собиқ ўйинчиси Дитмар Хаманннинг фикрича, Гвардиола «Манчестер Сити»да жуда узоқ қолиб кетган.
Хаманннинг таъкидлашича, мураббий ва клубда катта чарчоқ тўпланган, бу ҳолат ўтган мавсумда ҳам сезилган эди.
Унинг фикрига кўра, шундай суръатда «Манчестер Сити» Гвардиола қўл остида катта совринлар учун кураша олмайди.
«Ҳаммаси бир куни тугайди. Биз Клоппнинг “Ливерпул”ни тахминан саккиз йилдан сўнг тарк этганини кўрдик. У бу жуда оғир бўлганини, дам олишга муҳтожлигини айтди.
Гвардиола ўз клубида Клоппдан бир-икки йил кўпроқ ишлади. Бу жуда чарчатадиган иш. Сенда мажбуриятлар жуда кўп: фақат футбол эмас, матбуот билан ишлаш, сафарлар… Бу инсонни бутунлай эзиб қўяди.
Мен буни ўтган мавсумда ҳам ҳис қилганман… Пеп мавсум охиригача жамоани бошқаришда давом этганига жуда ҳайрон қолдим. Ундан аниқ умидни узишмайди ёки ундан воз кечишмайди, чунки у жуда кўп нарсага эришган. Лекин бу якуний босқич эканини сезиб турибман.
Гвардиола яна “Манчестер Сити” билан катта соврин — АПЛ ёки Чемпионлар лигасини ютишини тасаввур қила олмайман. Менимча, унинг вақти тугаб бормоқда. Жамоада 7–8–9 йилдан бери ўйнаб келаётган футболчилар бор. Уларга янада илҳом бериш қийин. Ва бу уларнинг ўйинида акс этади. Ҳаракатлари бироз суст кўринади», — деди Хаманн.
Матнда хатолик топсангиз, ўша хатони белгилаб, бизга жўнатинг (Ctrl + Enter).