«Арсенал» Англия кубоги 1/8 финалида куч жиҳатидан учинчи дивизионда ўйнайдиган ўртамиёна жамоа — «Мэнсфилд»га қарши майдонга тушди. Ушбу камтарона клуб аввалги босқичда АПЛ жамоаларидан бири — «Бёрнли»ни мусобақадан чиқариб юборган эди, аммо бу сафар уларга анча қийин бўлди.
«Арсенал» чоршанба куни Чемпионлар лигасида меҳмонда «Байер»га қарши ўйнаши кераклиги сабаб таркибда ротация бўлиши кутилган эди. Ва у жуда катта бўлиб чиқди. Лондонликлар таркибида ўйинни асосий таркиб футболчиларидан ҳеч бири бошламади. Олдинги ўйинга нисбатан старт таркибида фақат Москера ва Мартинелли қолдирилди, улар эса кўпроқ захира ўйинчилари қаторига киритилади.
Асосий таркибда ҳатто 16 ёшли Сэлмон ва Доумен ҳам майдонга тушди. Доумен шу орқали «Арсенал» тарихида Англия Кубогида майдонга тушган энг ёш футболчига айланди.
Эҳтимол, ротация қарорларига майдон ҳолати ҳам таъсир қилган. Газон яхши ҳолатда эмас эди ва бу жароҳат хавфини оширарди. Биринчи бўлимда Троссар жароҳат сабаб майдонни тарк этди, иккинчи бўлимда эса Калафьори ҳам мажбурий алмаштирилди.
Ўйиннинг ўзига келсак, «Мэнсфилд»нинг даражаси пастроқ экани сезилиб турди. Узатмаларда кўп хатолар ва яккакурашларда енгил ютқазишлар кузатилди. Бироқ ҳар бир муваффақиятли ҳаракат трибуналарда катта шовқин билан кутиб олинди.
Шунга қарамай, мезбонларда ҳам имкониятлар бўлди. Айниқса ўйин бошида. Масалан, 10-дақиқада «Мэнсфилд» чап қанот орқали ҳужум уюштириб, «Арсенал» дарвозаси олдида хавфли вазият юзага келтирди. Тўп Ридга келиб тушди ва у жарима майдони чизиғидан зарба берди, аммо Кепа тўпга етиб борди.
Меҳмонларда эса хавфли вазиятлар кўпроқ бўлди. Айниқса Мадуэке гол уришни жуда истади. У ҳатто бурчак зарбасини тўғридан-тўғри дарвозага йўллаб, тўсинга теккизди. Танаффус арафасида айнан Мадуэке ўрта масофадан кучли зарба бериб ҳисобни очди. Бу зарбада ҳимоячидан кичик рикошет ҳам бўлди.
Бироқ иккинчи бўлим мезбонлар голи билан бошланди. Сэлмон ўз ярим майдонида орқага узатма беришда қўпол хатога йўл қўйди. Натижада Уилл Эванс деярли яккама-якка вазиятга чиқиб, Кепани мағлуб этди — 1:1. Шу пайт трансляцияда «Мэнсфилд» клуби эгаси Жон Рэдфорднинг рафиқаси Кэролин билан қувониб қучоқлашгани ҳам кўрсатилди.
Шундан кейин «Арсенал» яна олдинга ташланди ва яхши имкониятлар яратди. Доумен ўзининг дриблинги билан ҳимоячиларни ортда қолдирди, аммо унинг зарбасини дарвозабон қайтарди. Кейин меҳмонларнинг «бешга икки» ҳужуми Жезуснинг зарбаси билан якунланди, ҳимоячи эса тўпни дарвоза чизиғидан узоқлаштиришга мажбур бўлди.
Кейин эса майдонга алмаштиришдан тушган Эзени ҳеч ким тўхтата олмади. У тўпни ўнг оёғига мослаб олиб, дарвозанинг «тўққизлиги»га аниқ ва кучли зарба йўллади.
Ўйин охирида ҳар икки жамоада имкониятлар бўлди. Мезбонлар уч марта пенальти талаб қилишди, аммо ҳакамни ишонтиришмади. Учинчи ҳолатда арбитр ҳимоячи Маклафлинга симуляция учун сариқ карточка кўрсатди. Қўшимча вақтда Мартинелли деярли гол уради, аммо тўп дарвозадан салгина четга чиқиб кетди.
Натижада таблода 1:2 ҳисоби қайд этилди.
Душанба куни Англия кубоги 1/4 финалига қуръа ташланади. Бу босқичда ҳам сараланган жамоалар бўлмайди, шунинг учун «Арсенал»нинг рақиби ҳатто «Ливерпуль» ҳам бўлиши мумкин.
Англия кубоги. 1/8 финал
7 март 2026 йил, шанба.
«Мэнсфилд Таун» — «Арсенал» — 1:2
Голлар: Мадуэке, 41 (0:1). Эванс, 50 (1:1). Эзе, 66 (1:2).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Динамо
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
