Киритилган сана: 2014-10-27 10:04

“Интер” клубининг бош мураббийи истеъфоси атрофидаги сериал давом этади.

“Sky Sport”нинг хабар беришича, дам олиш кунлари “Манчестер Юнайтед” клубининг собиқ бош мураббийини Милан шаҳрида кўришган. Тахминларга кўра, Мойес “Интер” раҳбарлари билан музокара олиб бориш учун ташриф буюрган. Шотландиялик мутахассиснинг сўнгги ойлар мобайнида бир неча бор Миланга ташриф буюргани унинг Эрик Тоҳир рўйхатидаги мураббийлар орасида фаворит эканидан далолат берса, ажаб эмас.

“Daily Mail”нинг ёзишича, Мойес “Интер”ни бошқаришга иккиланмоқда. Клуб сўнгги пайтларда оғир дамларни бошдан ўтказмоқда. Агар Мойес “Интер” билан ҳам яхши натижаларни кўрсата олмаса, шундоқ ҳам “Манчестер Юнайтед” билан омадсизликка учраган мураббийнинг фаолиятига жиддий салбий таъсир қилиши мумкин. Бошқа томондан, Дэвид Мойес “Интер”ни “Чемпионлар Лигаси”га қайтариб, ўзининг истеъдодли мураббий эканини исботлаш имконига эга.

Ҳозирда “Интер”да ишлаётган “МЮ”нинг собиқ ижрочи директори Майкл Болингброк Мойес ва “Интер” ўртасида воситачи вазифасини бажариши тахмин қилинмоқда.

Вальтер Маццари истеъфога чиқарилса, “Интер”даги унинг ўрнини эгаллашга бош номзодлардан яна бири – Роберто Манчини. Мураббий билан музокаралар олиб борилаётгани ҳақида бирор хабар тарқатилмаган бўлса ҳам, Манчинининг кечаги “Чезена” ва “Интер” ўртасидаги учрашувга ташриф буюриши бу борадаги шов-шувларнинг кўпайишига сабаб бўлди.

Шов-шув ва миш-мишлар тинмаётганига қарамай “Интер” расмийлари Вальтер Маццарининг истеъфога чиқарилиш эҳтимолини рад этиб келмоқда. Пьеро Аузилио ҳам, Эрик Тоҳир ҳам мураббийга ишонч билдирилишини таъкидлашда давом этишмоқда.

Сериал давом этади...  

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: