Киритилган сана: 2014-05-05 16:18

Мадрид шаҳрининг икки жамоаси ҳам бу йилги мавсумни жуда ажойиб ўтказишди. "Атлетико" жамоаси Ла-лигада ишонч билан карвонбошилик қилаётган бўлса, "Реал" эса Қирол Кубогини қўлга киритди. Ана энди бир-бирларига азалий рақиб бўлган бу жамоалар Чемпионлар Лигаси финалида ҳам беллашадиган бўлишди. Демак, финалда эл-классико эмас, дерби курамиз. Бир шаҳарнинг бир-бирларига муносиб бу икки жамоаси ўртасидаги кураш азалдан ҳам мухлису мутахассисларнинг диққат марказида бўлиб келган. Қайси тўрнирда бўлмасин, "Реал" ва "Атлетико" ўзаро учрашадиган бўлса, жамоалар жадвалнинг қайси ўрнида жойлашишларидан қатъи назар ўйин жуда қизиқарли курашларга бой ўтган.

Шунинг учун "Реал" -"Атлетико" ўйинининг эл-классикодан ҳеч қандай кам жойи йўқ! Мана, Диего Симеоне бошчилигидаги жамоа бу йил анча ўйинини топиб олди. Европанинг манаман деган жамоалари ҳам "матрасчилар" билан ўйнаганда биринчи ўринда эҳтиёткорликни қўядиган бўлишмоқда. Бу йилги "Атлетико" менга 1996 йилда Испания чемпиони бўлган "Атлетико"ни эслатмоқда. Бугунги кунда бош мураббий вазифасини бажараётган аргентиналик Диего Симеоне ўшанда жамоанинг етакчи ўйинчиларидан эди. Ўшанда "матрасчилар" таркибида болгариялик Любо Пенев, югославиялик Миленко Пантич, Испания терма жамоаси аъзолари Хуан Лопес, Роберто Салосабаль, Каминеро, Кико, Молина, Хели, Вискайно каби маҳоратли футболчилар ҳаракат қилишарди. Уларни югославиялик машҳур мураббий Радомир Антич бошқарарди. Хуллас, ўша мавсумни йўл-йўл либослилар анча кўтаринки руҳда ўтказишди. Масалан, "Атлетико" мамлакат грандларидан бири "Барселона"ни бир мавсумда 3 марта (чемпионатда 2 марта, Қирол Кубоги финалида 1 марта) мағлуб эта олишди. Мавсум охирида ҳам чемпионликни, ҳам кубокни қўлга киритиб "олтин дубль" нишонлашга муваффақ бўлишди.

Аммо келгуси 1996/1997 йилги мавсум "Атлетико" учун осон кечмади. Мавсум ўртасида уларнинг асосий рақиблари бўлмиш "Реал" ҳам, "Барса" ҳам таркибларини бир қанча маҳоратли футболчилар ҳисобига бойитиб олишди. "Реал" таркибини хорватиялик Давор Шукер, югославиялик Предраг Миятович, бразилиялик Роберто Карлос, голланд Кларенс Зеедорф, немис Бодо Иллгнер каби маҳоратли футболчилар тўлдиришган бўлса, каталонияликлар сафида бразилияликлар — Жованни, Роналдо, француз Лоран Блан, португалиялик Луиш Фигу каби футбол юлдузлари ҳаракат қилишди. Шунинг учун оғир кечган мавсумда "Атлетико" 5-ўрин билан кифояланди. Масалан, ўшанда мамлакат чемпионлигини қўлга киритган "Реал" ҳамшаҳарларини уйда ҳам, меҳмонда ҳам мағлуб эта олди. "Атлетико" майдонида кечган баҳсда "Реал" ўзининг нималарга қодирлигини намойиш эта олди. Ўша учрашувда кимлар майдонда ҳаракат қилганини ҳам бир эслайлик.

Испания премьероси-1996/1997й.
"Атлетико" - "Реал" - 1:4
Мадрид. "Висенте Калдерон". 58000 томошабин. 18.01.1997 й.
Ҳакам: Эдуардо Итурральде Гонзалес
"Атлетико": Молина, Тони Муньос, Хели, Радек Бейбл, Каминеро, Санти, Даниэль Продан (Хуан Лопес, 65), Миленко Пантич, Кико (Хуан Карлос, 73), Велько Паунович, Хуан Эснайдер (Вискайно, 78).
Бош мураббий: Радомир Антич.
"Реал": Иллгнер, Алькорта, Йерро, Роберто Карлос, Пануччи, Амависка, Редондо, Зеедорф, Рауль, Миятович, Шукер (Виктор,78).
Бош мураббий: Фабио Капелло.
Четлатиш: Миятович.
Голлар: Кико (32), Рауль (46, 82), Зеедорф (84), Виктор (89).

Куриб турганингиздек, биринчи таймда 0:1 ҳисобида ютказаётган "Реал" иккинчи таймда "матрасчилар" дарвозасини 4 марта аниқ нишонга олган. Тағин ҳам бу ишни сон жиҳатдан кам бўлиб уддалаган. Ўзи Мадрид дербисида кўпинча "Реал"нинг қўли баланд келган. Масалан, "Атлетико" чемпион бўлган 1995/1996 мавсумида ҳам "Реал" ҳамшаҳарларини 2 ўйинда юта олди — 2:1, 1:0.

Бундан 18 йил олдин Испания чемпиони бўлган "Атлетико" бу йил ана шу совринга жуда яқин турибди. ЕЧЛ финалига ҳам чиқди. Ўтган 18 йил оралиғида ўртамиёна жамоалар қаторига ҳам киришди. Ҳатто пастки двизионларга ҳам "саёҳат" қилиб келишди. Лекин жамоанинг ютуқлари ҳам йўқ эмас. "Матрасчилар" бу давр оралиғида Қирол Кубоги, УЕФА Кубоги, Европа Лигаси, УЕФА Суперкубоги каби нуфузли мусобақаларни ютишди. Эндиги мавсумда мамлакат чемпионлигига жуда яқин туришибди. ЧЛ финалига чиқишди. Улар бу йўлда "Милан", "Барселона", "Челси" каби жамоаларни мусобақадан чиқариб юборишди.

Дарвоқе, "Атлетико" бундан 40 йил муқаддам ЧЛ финалида ўйнаган. Ўшанда "матрасчилар" финалда Мюнхеннинг "Бавария" жамоаси билан ғолиблик учун кураш олиб борган. Ўйиндан олдин "Атлетико" бош мураббийи аргентиналик Хуан Карлос Лоренцо "учрашув тақдирини биргина гол ҳал қилади" деб башорат қилди. Асосий вақтда ҳисоб очилмади. Қўшимча 30 дақиқалик якунланишига 7 дақиқа қолганда 36 ёшли "Атлетико" фахрийси Луис Арагонес ҳисобни очади. Бу ўша Испания терма жамоаси билан 2008 йилда Европа чемпионлигини қўлга киритган, яқиндагина вафот этган Луис Арагонес. Шундан сўнг "Бавария" бутун жамоа бўлиб ҳужумга ўтади. Ниҳоят 120-дақиқада Шварценбек 30 метрлардан кучли зарба йўллаб, олтинга тенг голни киритади. 2 кундан сўнг такрорий ўйин ўтказилади (у пайтлар пенальтилар серияси ўтказилмасди). Такрорий учрашувда "Бавария" рақибига ҳеч қандай имконият қолдирмайди — 4:0.

Шуни таъкидлаш керакки, ўша ўйинларда "Атлетико"нинг 3 нафар етакчи футболчиси дисквалификация қилинганди. Ярим финалдаги Шотландиянинг "Селтик" жамоасига қарши жанжалли ўйин бунга сабаб бўлганди. Ўша воқеаларни "Бавария" юлдузи Герд Мюллер шундай хотирлайди:

"1974 йилнинг 17 майида Мадриднинг "Атлетико"сига қарши жавоб ўйинида майдонга тушдик. Тўпни эгаллаб олган заҳотим уни ерга туширдим ва ўткир бурчак остидан дарвоза тўсини остига йўлладим. Бу менинг бутун футболчилик фаолиятимдаги энг чиройли голим эди. "Бавария" рақибини 4:0 ҳисоби билан таслим этди ва биз ҳаммаси учун ўз ҳимоячимиз Ханс-Георг Шварценбекдан қарздор эдик. Ўшанда у қўшиб берилган сўнгги дақиқаларда узоқдан зарба беришга қарор қилган ва мен унга "Тепма!" деб бақиргунимча тўп дарвоза тўрига келиб тушганди".

Чемпионлар кубоги-1973/1974 й. Финал
"Бавария" - "Атлетико"- 1:1. Асосий вақт — 0:0. Қўшимча вақт — 1:1.
Брюссель. "Қирол Бодуэн". 65000 томошабин. 15.05.1974 й.
Ҳакам: В.Лоро (Бельгия).
"Бавария": Майер, Хансен, Брайтнер, Шварценбек, Беккенбауэр, Рот, Торстенссон (Дюрнбергер, 77), Цобель, Г. Мюллер, Хёнесс, Каппельман.
Бош мураббий: Удо Латтек.
"Атлетико": Рейна, Мело, Капон, Аделардо, Эредиа, Эусебио, Уфарте (Бесерра,68), Луис Арагонес, Ҳарате, Ирурета, Салседо (Альберто, 88).
Бош мураббий: Хуан Карлос Лоренцо.
Голлар: Луис Арагонес(113), Шварценбек (120).

Такрорий ўйин
"Бавария" - "Атлетико" - 4:0.
Брюссель. "Қирол Бодуэн". 35000 томошабин. 17.05.1974 й.
Ҳакам: А.Делькур (Бельгия)
"Бавария": Майер, Хансен, Брайтнер, Шварценбек, Беккенбауэр, Рот, Г.Мюллер, Торстенссон, Цобель, Хёнесс, Каппельман.
"Атлетико": Рейна, Мело, Капон, Аделардо (Банегас, 58), Эредиа, Эусебио, Бесерра, Луис Арагонес, Ҳарате, Салседо, Альберто (Уфарте, 58).
Голлар: Хёнесс (28, 81), Г.Мюллер (57, 70).

Шундай қилиб, бундан 40 йил муқаддам тайёр ғалабани қўлдан чиқариб юборган "Атлетико" яна финалда. Уларнинг рақиблари "Реал" ҳам ҳазилакам жамоа эмас. Улар буни ярим финалдаги "Бавария"га қарши жавоб ўйинида тўла-тукис исботлашди. Агар ўша куни "Бавария"дан бошқа жамоа бўлганда ҳам "Реал"га "ем" бўларди десам, ишонаверинг. Лекин финал бу бошқа масала. Унда кимнинг ўйини яхши чиқса, ўша ютади. Шуни таъкидлаб ўтиш керакки, бу ўйинда Мадриднинг "Реал" жамоасини фаворит санаётганлар адашадилар. Чунки "Милан", "Барселона", "Челси" каби тажрибали жамоаларнинг "Атлетико"га қарши бирор чора қўллай олмаганини ўз кўзимиз билан кўрдик.

"Реал" ҳам бу босқичгача анча зафарли йўлни босиб ўтди. Қизиғи шундаки, плей-оффда "Реал" мағлуб этган жамоаларнинг ҳаммаси Германия Бундеслигаси етакчилари. Улар бу йил қандай бўлмасин ўз тарихларида 10-марта ЧЛ ғолиблигини нишонлашни максад қилишган. Бундан 12 йил муқаддам Қироллик клуби Германиянинг бошқа бир жамоаси - Леверкузеннинг "Байер" клубини мағлуб этиб, 9-ғалабани нишонлаганди. Ўша куни "Реал"нинг франциялик юлдузи Зайниддин Зидан томонидан киритилган ғалаба тўпи ҳанузгача ЧЛ тарихидаги энг чиройли гол бўлиб турибди.

Чемпионлар Лигаси-2001/2002 й. Финал.
"Реал" - "Байер" - 2:1.
Глазго. "Хэмпден Парк". 52000 томошабин. 15.05.2002 й.
Ҳакам: Урс Майер (Швейцария).
"Реал": Сезар (Касильяс, 68), Мичел Сальгадо, Йерро, Иван Эльгера, Роберто Карлос, Солари, Макелеле (Флавиу Консейсау, 73), Зидан, Фигу (Макманаман, 73), Рауль, Морьентес.
Бош мураббий: Висенте дель Боске.
"Байер": Бутт, Пласенте, Шебечкен (Кирштен, 65), Лусио (Бабич, 90), Живкович, Б.Шнайдер, Рамелов, Баллак, Йилдирай Боштурк, Нойвилль, Брдарич (Бербатов, 38).
Бош мураббий: Клаус Топмёллер.
Голлар: Рауль (9), Лусио (14), Зидан (45).

Ўша ўйиннинг энг сўнгги дақиқасидаги ҳаяжонли воқеалар ҳеч ёдимдан чиқмайди. "Реал" дарвозабони "Байер" футболчиларининг 4 та хавфли зарбасини бартараф этиб, жамоасига чемпионликни олиб берганди.

Шундай қилиб ЧЛ тарихида биринчи марта бир шаҳарнинг икки жамоаси ғолиблик учун кураш олиб боради. Ла-лига баҳсларидаги илк учрашув "Сантьяго Бернабеу"да ташкил этилди. Унда "Атлетико" рақибини 1:0 ҳисоби билан енгди. Кейин жамоалар қишда Қирол кубоги ярим финалида тўқнаш келишди. Ўйиндан олдинги матбуот анжуманида "Реал" бош мураббийи Карло Анчелотти: "Биз ҳозир кузда "Атлетико"га ютқазган "Реал" эмасмиз", деди ва "Реал" рақибини ҳар иккала учрашувда ҳам таслим этди - 3:0, 2:0.

Кейин яна Ла-лига баҳсларидаги тўқнашув. Бу сафар эса жамоалар муроса кўчасини танлашди - 2:2. Энди эса Кўҳна қитъанинг клублар ўртасидаги энг нуфузли мусобақаси бўлмиш Чемпионлар Лигаси финалида насиб этса, Мадрид дербисини томоша қиламиз. Юқоридаги фактларга суянган ҳолда имкониятларни 50 га 50 деб баҳолардим. Қани курайлик-чи, 40 йил муқаддам 100 фоизли имкониятни қўлдан чиқарган "Атлетико"нинг иштиёқи кучлими ёки ўз тарихида 10-марта ЧЛ ғолиблигини қўлга киритиш учун астойдил бел боғлаган "Реал" кучлироқми? 24 майни интизорлик билан кутамиз. 

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: