Киритилган сана: 2019-02-26 14:38

ОК-2019да бир бирига мутлоқ ўхшамаган 4та ўйин ўтказдик. 7та ўйинда иштирок этиб қайтмоқчи эдик. 7та ўйин тажрибаси бош мураббий ва йигитларимизга асқотар эди. Унинг натижалари Сизу бизга жуда-жуда мароқли бўлар эди. Нима учун бу орзу-ният амалга ошмади? Нимани ўхшата олмадик? Шу саволлар барчанинг, шу жумладан менинг ҳам ўй-хаёлимдан ўчмаяпти. Купер ишининг мағзини чақа олмасак-да, ҳозир ҳамма уни оқлаш, ёқлаш билан овора. ТВ орқали Сульшер ишига тикиламану, Европа футбол тўйларида ўйинларни маза қилиб кузатаману, ичимда “аза очган” футболимиз дастидан “ўз дардимни айтиб йиғлайман”. Бошимизга ёғилгувчи мавсумий “кўчманчилик чанг-тўфонидан” асраниб уйда қолиб газеталарни ўқиган бўламану, тағин қайта бор термамиз ўртага ташлаган саволларга ўз жавобимни қидираман. Лекин жавоб тополмайман. Саволларга савол қўшилиб кета беради.

Сайтларга кира билмасам-да, уларни ўқий олмасам-да, интернетнинг борига шукр дейман. Айни сайтлару телеграмлар туфайли ёзганларим Сизларга етиб бормоқда, ЎЗИга шукр дейман. Интернетнинг борига шукр, минг шукр.

“Дастурхоним”нинг борига шукр қиламан. Уйдан чиқмаётган бўлсам-да, Осиё кубоги пайтида журналистларнинг ТВдаги қизғин суҳбатларида қатнаша олмаган бўлсам-да, ҳаммани хаёлан “дастурхонимга” таклиф қила оламан. Ҳамма билан сиртдан суҳбат қура оламан. Сиртқи “Дастурхон”имнинг борига шукр.

Эктор Купернинг борига шукрлар бўлсин. Унгача ҳеч бир бош мураббийнинг ишини бундай қизғин муҳокама қилмаган эдик. Купернинг термамиздаги фаолияти футболимиздаги ислоҳотлар даврига тўғри келгани учун шундай бўлмоқда. Ушбу бош мураббий ва унинг фаолияти ислоҳотларимизнинг мантиқий давоми бўлган сўз эркинлигини ўзида акс эттирмоқда. Ислоҳотларимиздаги нуқсонлар Купер ишида ҳам, терма фаолиятида ҳам ўз аксини топмоқда. Термамиз ҳаёти ислоҳотлар учун лакмус қоғози бўлмоқда. Купернинг борига шукр.

Сизнинг, азизларим, борингизга шукр. Сиз бўлмасангиз футбол қайда-ю, Купернинг кимга кераги бор эди? Менинг ёзувкашлигимда нима маъно бўларди? Қуруқ валдираш бўлар эди. Ҳаммаси сизлар учун. Ҳаммаси сизларни деб бўлмоқда. Ҳаммасига шукр. Борингизга шукр.

1. Зидан

Бобур Акмалов. Ҳасанали-ота, ишимизда ҳозиржавоблик асосий ўлчов-ку. Сиз доим кечикиб йўталасиз. Янги кун ҳаёти ва воқеалари ичидамиз. ОЧЛ саралаш ўйинларини ҳам кўрдик...

Ҳасанали Қодиров. Тўғри гап. Қаричилик. Тезкорлигим ёшликда қолиб кетган. Аслида ёшлигимда ҳам оғир карвон эдим. Лекин бошқа жиҳат ҳам бор. Эҳтирослар тиниб бўлгач, хотиржам фикрлашсак, тиллашсак, диллашсак бўлади.

Б.А. Албатта, бугун бош мавзу термамиз атрофида гиргиттон бўла қолсин. Шу билан бирга ҳеч кимни мавзу бўйича чеклаш ниятим йўқ. Ҳаёт давом этмоқда, футбол давом этмоқда. ОЧЛ гуруҳ ўйинлари саралашига старт берилди. Аввал “Пахтакор”да биринчи саралаш баҳсида “Эйр Форс”ни қабул қилиб ютдик (2:1). Кейин Амирликка бориб “Ан-Наср”ни ҳам ютдик. ОКМКни гакпирмай қўя қолай. Лекин, терма фаолияти эскирмас, доим долзарб мавзу бўлиб қола беради. Купернинг кўрсатган 4та ўйини ўзининг янгидан-янги танқидчиларини, таҳлилчиларини ўз атрофига торта беради.

Ҳ.Қ. Ҳозирча улар икки тоифага ажралиб қолишди, гўё. Қаҳрамон, Сиз, kun.uz’да уларнинг бирини “истеъфочилар” деб номлабсиз. Шунга кўра мен иккинчи тоифага Купер фаолиятининг хайрихоҳлари деб ном берсам бўлар экан-да? Ундай эмас. Дастурхонимиз атрофига бугун учинчи ё ўн бешинчи тоифани йиғмоқчи эмасмиз. Хоҳлаймизми-йўқми, истаймизми-йўқми Купер ЖЧ йўлланмаси курашида термамизга бош бўлади. Унинг истеъфоси масаласини кўтариб чиқа олмаймиз. Истеъфога чиқарсак, бемаънилик бўлади. Шу билан бирга, Куперга тарафкашлик хам қилмаймиз. Термамиз манфаати диққат марказимизда турсин. Шундай экан, мазкур икки хил бир-бирига қарши чиқишлар бир кунлик гаплардир. Эрта кунимиз учун 4та ўйин сабоғини аниқлаб олайлик. Шуниси муҳимроқ. Ҳар бир ўйин алоҳида кўринишга эга бўлди.

Абдураҳим Абдураҳмонов. Термамизнинг аниқ-тиниқ ўйин услуби йўқлиги бизни хавотирга солаётган эди. Очиғи, термамизнинг қитъа чемпионатида яхши иштирок этишига унчалик ишонмагандик. Умид қилгандик, кутгандик, аммо ишонмагандик, барибир (“Аср футболи”. №4, 2-б.)

Б.А. Узр, гапингизни бўлдим. Ҳозир статистика рақамларидан қатъий назар, нимчорак натижасидан қатъий назар, расмий назарга, расмий эътирофга эргашиб Эктор Куперга ишонмоқдамиз. Ишонишга мойилроқ бўлиб қолдик. Шуниси ҳаммага қулайроқми, дейман. Давом этинг.

А.А. Гапимни тугатдим.

Ҳ.Қ. Нафақат Сиз Абдураҳим, бутун футбол оммаси ишонмаган эди. Ҳозир ҳам дилдан ишонувчилар кам. Футболчиларда ҳам ишонч бошида тўлиқ эмас эди. Бу ҳол биринчи ўйин сийратига таъсир қилмай қолмади. Купер эса, хотиржамлик билан ўзига ишониб ўз ишини қила берди. Камчиликларни ўйин сайин кузата берди. Ўйинни тузата берди.

Темур Кападзе. Уммонга қарши учрашувдан олдин футболчиларимизнинг ўйин амалиёти йўқлиги ҳақида кўп гапирилди. Бу эса, баҳс мобайнида билиниб қолди. Бир-бирини тушуниб ўйнашда кўп хатоларга йўл қўйишди («Ф.Э.», №6, 12-б.).

Ҳ.Қ. Терма таркибини ўзи учун аниқлаб олгунга қадар Купер ўртоқлик ўйинларини уюштирди. Туркиядаги йиғинда ўйин устида ишлар экан, жангу-жадалнинг ўзи тугул ҳиди ҳам бўлмайдиган, 8та ўйинчи алмашадиган ўртоқлашувларнинг унга кераги бўлмай қолди. Темур, Сиз эътибор берган бир-иккита узатмаларнинг хато кетгани ҳал қилувчи хато бўлгани йўқ. Хато, нуқсонлар бошқа сабабдан бўлган.

Б.А. Темуржон, биласизми, Сиз футбол тарғиботига янги нафас олиб кирдингиз. Сиздан олдин бизнинг ОАВмизда собиқ футболчилар, ё мутасаддилар, ё бошқа мутахассислар ўйин анализи билан давлат тилида сўзлаб чиқишмас эди. Европада жуда кўп футболчилар майдондаги фаолиятидан сўнг ТВда аналитик бўлиб ишлашади. Бизда бу соҳада Сиз биринчи бўлдингиз. Бардавом бўлсин. Онда-сонда афсонамиз бўлган Абдураимовнинг чиқишларини ҳисобга олмадим.

Ҳ.Қ. Купер кўнгли тўқ одам экан. Бугунги терма билан нима қилиш мумкин бўлса, нимани лозим топса шуни қилмоқда. Энг аввало, у янги ўйин услубини яратмоқда. Ҳали тўлиқ ярата олгани йўқ. Янги тактикани эмас, Янги услубни яратмоқда. Янги ўйин элементлари кўриниб қолмоқда. Тўртта ўйинда ўйин борасида тўрт хил вазифани ўз олдига қўйди. Буни ўзи билади. Масалан, Липпи Хитой термаси билан бир йилча ишлади. ЖЧ-2018 йўлида жамоа билан муҳим расмий ўйинларни ўзи ўтказган эди. Шундан келиб чиқиб айтсам, янги ўйинни яратишга вақт етарли эди. Биз янги ўйинни кўрмадик. Қилган иши нима бўлди? Ўйин сифатини бир оз оширди, холос. Фикримни Сизга тушунтиришга ҳаракат қиламан.

Масалан, Гвардиоланинг бултурги ўйини эскириб бўлди. У янгиттан бошқа бир ўйинни яратиши керак. Буни у ўйламаяпти ҳам. Майда ўта тезкор оширмалар билан тўпга эгалик қилиш, чап ва ўнг қанотлардан ёриб ўтиш, ўткир зарбалар билан марказга ошириш ва яқин масофадан гол уриш. Гвардиола шу ўйин билан АПЛни ютиши мумкиндир балким, лекин бу йил ҳам ЕЧЛни юта олмайди. Бу аниқ. Демоқчиманки, Гвардиола эски ўйин матосига қўшимча қилиб яна бир-икки бўёқ берганидан кўра, янги ўйин тасвирини яратиши керак.

2017-2018 йилги мавсум бошида Зидан ўз олдида янги ўйин яратиш вазифаси турганини тушунди. Баъзи ўйинларга қўшиб Ла-Лигани ҳам бой бериб бўлса-да, “Реал” янгича ўйнай бошлади. Натижада Зидан ўз жамоаси билан учинчи марта кетма-кет ЕЧЛ ғолиби бўлди. Бугун ҳам Зидан яратган ўша ўйин тасвири мева бермоқда. ЕЧЛнинг нимчорагида Аяксга қарши ўйинини эсланг. “Реал”нинг қайта тикланишида ўша ўйин асқотяпти.

Мавзуга, ОК-2019га қайтайлик. Масалан, Вьетнам ва Қатар жамоаларининг ижрочилар савияси ҳар хил даражада бўлса-да, ҳар бири Амирликка янги ўйинни пишиқ-пухта қилиб олиб келишибди. Мен янги ўйин тасвирини, масалан, Хитой термасида ва ўз ўйинимизда кўрмадим. Биз интизомли футбол ўйнашга интилдик, холос.

Давоми бор.

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: