Киритилган сана: 2016-12-20 14:58

Томошо қилгандирсиз, Япониянинг «оддий» клубларидан бири - «Кашима Антлерс» сал қолса, Клублар ўртасидаги жаҳон чемпионати ғолибига айланарди... Эҳ, агар японлар ижобий натижани сақлаб қолишганидами, дунё футболи бутунлай ағдар-тўнтар бўлиб кетарди, балки. Бироқ салгина ўхшамади, нимадир етишмади. Аммо «Реал» учун бу сафарги мундиал шундоқ ҳам узоқ вақт ёдда қоларли даражада ўтгани тайин. Ахир кўп мақталган мадридликлар «кунчиқар юрт»да анча қийналишди, анча...

«Кашима»га эса ҳар қанча тасанно йўлланса ҳам, кам. Японлар на «Реал» ва на Роналдудан ҳайиқдилар. Улар ижросидаги дадил ўйин таҳсинларга лойиқ, Шибасаки ва Согахата эса аллақачон Европанинг гранд клублари тинчини бузишди. Уларнинг номлари номдор устозлар ён дафтарчасига тушган бўлса, ажабмас. Зеро, Шибасаки «Реал»дек грандни бирин-кетин 2та гол асносида «сийлади», Согахата эса «Кашима Антлерс» дарвозасини шараф билан қўриқлади. Гарчи бу голкипер  4та гол қўйиб юборган бўлса-да, Роналдунинг яқин орадаги тушларига ҳам кириб чиқса керак. Чунки у ишончли ҳаракат қилмаганида, португалиялик ҳужумчи «хет-трик» эмас, «пента-трик», «гекса-трик» ва яна алламбало-«трик»лар қайд этиши ҳеч гап эмасди. Дунё футболида рақибнинг кучсизлиги туфайли рекорд ўрнатадиган ўйинчилар кўп. Масалан, жаҳон чемпионатлари тарихида 16та гол урган ва бу билан энг яхши тўпурар мақомида юраётган Мирослав Клозени олайлик. Унинг бу натижасида Саудия Арабистони терма жамоасининг ҳиссаси катта. Ёдингиздами, саудлар жаҳон чемпио­нати финал раунди доирасида Германия термасига 0:8 ҳисобида ют­қазишган ва голларнинг нақ 3таси айнан Клозе ҳисобига ёзилганди. Айтингчи, агар ўшанда қитъа­дошларимиз «Қирол Миро»нинг «хет-трик»ни расмийлаштиришига тўсқинлик қилишни уддалаганларида, у афсонавий Роналдога қандай етиб оларди?

Орамизда ким «Кашима»нинг ҳам «Реал»га қарши кечган ўйинда худди шундай «миссия»ни бажаришини тахмин қилган бўлса, у қаттиқ адашди. Аксинча, «кунчиқар» юрт вакиллари футболни қандай ўйнаш кераклигини ҳаммага кўрсатиб бердилар. Ҳаттоки, ўша «Реал»га ҳам. Мадридликлар ўйинда шунчаки, савия ҳисобига ютиш иложини тополмадилар, ҳарқалай. Тўғри, юлдузларга тўлиб-тошган «Реал» якунда ҳисобни 4:2га етказди, барибир, аммо ким аслида кимлигини айнан «Кашима Антлерс» исботлади, гўё.

Ўзбекистон терма жамоаси мураббийлар штабининг қай тартиб ва йўсинда иш олиб боришидан бехабармиз. Айтишларича, Вадим Абрамов миллий жамоани бошқарган пайт футболчиларга «Барселона» ўйинлари видеоёзувини қўйиб берган экан. Бу тадбир қай даражада фойда келтирганини яхши биламиз. Агар ҳозирги мураббийлар штаби шу ишни давом эттиришдан ор қилмаса, «Реал» - «Кашима Антлерс» ўйинидан ҳам қўлланма сифатида фойдаланса бўлади. Ҳар ҳолда, йигитларимиз финални жамоа­вий ҳолда томоша қилишса, зарар қилмасди. Нима учун? Йўқ, бу ўйиндаги тактик ишланмалар, услуб ёки комбинациялар қизиқ эмас. Шунчаки, футболчиларимиз «Кашима» намойиш этган важоҳат ва ирода кучини кўриб қўйишларини истардик.

Бир ўйланг, японларда «Реал»га қарши қўйиш мумкин бўлган нима бор эди? Ҳимоя, ҳимоя ва фақат ҳимоя. Лекин ҳамма бало шундаки, нуқул орқа чизиқда ўйнайдиган жамоанинг омади 10та ўйинда бир марта келиб қолиши мумкин. Ҳаммамиз Хиросима-94 ярим финалини кўп эслаймиз. Ўшанда Ўзбекистон миллий жамоаси Жанубий Корея термасини 1:0 ҳисобида мағлубиятга учратганди. Аммо тан олайлик, ўша ўйин яна 10 марта қайта ўтказилса, барчасида кореяликларнинг ғалаба қозонишлари эҳтимоли катта эди. Қаранг, японлар ҳимоявий ўйиндан, боз устига, Клублар ўртасидаги жаҳон чемпионати финалида, ор қилишди ва номдор рақибга қарши қўрқмасдан, дадил тўп суришди. Уларнинг бу ҳаракатлари натижасида «Реал» сал қолса, Япониядан бошини эгиб чиқиб кетарди. «Кашима» футболчилари эса гарчи мағлубиятга учраган бўлишса-да, майдондан бошларини кўтарганча, мағрур чиқишди. Улар бунга муносиб эдилар. Японлар ҳаттоки, «Реал»га қарши тенгма-тенг ўйнай олишларини исботлаб бердилар. Энди улардан қўрқ­қулик...

Давоми iff.uz сайтида

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: