Киритилган сана: 2012-04-27 23:54

"Барселона" президенти Сандро Россел томонидан 2007-2008 йилги мавсум якунида Франк Райкард ўрнига клуб бош мураббийи этиб тайинланган Хосеп Гвардиоланинг клубдан кетиши ҳақидаги қарори бугунги матбуот ва интернет нашрларининг асосий мавзусига айланди. Ҳақиқатдан ҳам, бугун Гвардиола мавсум якунланиши билан клубдан кетишини расман эълон қилди. Матбуот анжуманида ушбу қарорини эълон қилар экан Гвардиола - клубдан ҳеч қандай унвонларни эмас, у билган ўтказган вақтларидаги ёрқин хотирадарни ўзи билан олиб кетаётганлигини айтиб ўтди. Дарвоқе, у клуб ва унинг мухлисларига қўл остидаги футболчилар билан эслашга арзигулик хотираларни тақдим эта олди. "Барселона"нинг ушбу мураббий қўл остида 4 йил давомида 13 кубокни қўлга киритганиинг ўзиёқ унинг салоҳияти ҳақида сўзлаб турибди. Пеп бошчилигидаги каталонияликлар ўтказилган расмий 242 ўйининг 175 тасида ғалаба қозониб, 46 тадуранг қайд этганликлари, тўплар нисбатининг 618-178 эканлиги ҳам Гвардиола кучли жамоани шакллантира олганлигини кўрсатиб турибди. Пеп "Ноу-Камп"даги "Барселона" музейига уч бор Испания чемпионати олтин медаллари, бир марта Испания кубоги (иккинчисини қўлга киритишга яқин турибди), уч марта Испания суперкубоги, икки марта Европа Чемпионлар лигаси кубоги, икки марта Европа суперкубоги ва икки марта клублар ўртасидаги жаҳон чемпионати кубогини тақдим этган жамоани шакллантира олди. У Роналдиньодан воз кечиб, Мессини дунёнинг энг яхши футболчиси бўлиши учун имкон яратди, Это'о ва Ибрагимовичнинг маҳоратига ҳам кўз юмиб, Бускетс, Педроларни кашф эта олди, Кркич, Куэнка, Телло, Алькантара каби иқтидорларга асосий таркиб эшикларни очиб берди. Кубокларни қўлга киритишдан ташқари, ёш иқтидорларни кашф этиб берди. хўш, Пепнинг кетишига унинг шогирдлари қандай муносабат билдиришди? Шуни таъкидлаш лозимки, бугун ўткизилган матбуот анжуманида қатнашган футболчиларнинг Пепнинг кетишига бўлган муносабати уларнинг юзидаги тушкун кайфиятдан ҳам аён эди. Шунингдек, "Барса" футболчиларининг кўпчилиги твиттердаги ўз аккаунтдарида қуйидагича фикрларни ёзиб қолдиришди:

‏Сеск Фабрегас (@cesc4official): "Гарчи унинг қўл остида бор-йўғи бир йил шуғулланган бўлсамда, лекин бу гўёки кўпдай туюлмоқда. Мен учун Пеп болалигимдан буён футболчи сифатида менинг кумирим ва мураббий сифатида илҳомбахш мураббий. Биз билан ўтказилган қисқа фурсат учун унга раҳмат айтаман ва бир умр ёдда сақлайман."

Тиаго Алькантара [@thi_alcantara91]: "Сен футболда энг юксак чўққини забт этдинг ва абадий у ерда қоласан! Сен доим буюксан! Раҳмат, ПЕП!!!"

Жерард Пике [@3geradpique]: "Бизга шунча кўп нарсалар берганинг учун раҳмат, Пеп! Ғалабалар ва хурсандчиликларга тўла тўрт йил - ҳаммаси сенинг ўгитларинг туфайли..."

Карлес Пуйол [@carles5puyol] : "ҲАММАСИ УЧУН РАҲМАТ, ПЕП!!! Сен бизга йўлимизни кўрсатиб бердинг..."

Педро Родригез [@_pedro17_]: "Клубга берганинг ҳаммаси учун раҳмат, ПЕП "

Андрес Иниеста: "Унга клубда ўтказган йиллари учун ва унутилмас мавсумларда биз билан бирга бўлгани учун раҳмат ташаккур!"

Исаак Куэнка [@cuencaisaac] : "Буюк инсон! Буюк Устоз! Раҳмат, ПЕП!

Дани Алвеш [@danialvesd2]: "Бизга ўз ўғлидек муносабатда бўлган Пепнинг кетиши қарорини эшитиш оғир. Биз хафа бўлдик, лекин мен Пепнинг нафақат футболчи сифатида балки инсон сифатида ҳам бизга ўргатган ҳар бир дарси учун раҳмат айтаман,

Давид Вилья:"Икки йилдан ортиқроқ клубда бирга бўлганинг учун, клубга берган ҳар бир ҳаракатинг учун раҳмат, ПЕП!

Христо Стоичков (собиқ Барса футболчиси): "Бугунги кундан хафаман. "Барселона"ни унинг афсонаси тарк этди. Бир йилда 6 унвонни қўлга киритадиган мураббий яна бўладими йўқми билмадим."

Сандро Россел (клуб президенти): "Клубнинг футбол фалсафсини муҳокама қилинмайдиган даражада юқори чизиққига олиб чиққанинг учун раҳмат, ПЕП!"

Юқорида келтирилган фикрларлардан хулоса қиладиган бўлсак, Гвардиоланинг кетишини ҳеч ким олқишлаб кутиб олмаганини сезиш мумкин. Лекин, ҳаёт тўхтаб қолгани йўқ. Гарчи кейинги кунларда содир бўлаётган воқеа - Пепнинг жамоадан кетиши айрим фанатларни тушкунликка тушираётган бўлсада, бироқ ҳаёт давом этмоқда. Ҳеч қайси биримиз бундай бўлишини ҳоҳламаган эдик, лекин қачондир шундай кун келишини билардик.
Аввало, Гвардиолани "Барселона"да олиб қолиш учун қўлидан келганча ҳаракат қидгани учун жамоа президенти Росселга раҳмат. Барча "Барса" футболчиларига, Гвардиолани жамоада қолишга кўндириш учун қилган ҳаракатлари учун айниқса, Пуйол, Иниеста, Фабрегасларга раҳмат.
Матбуот анжуманида эълон қилинганидек, эндиликда Тито Вилланова каталонияликларга мураббийлик қилади. Унинг Пеп билан ўринбосарлар ҳамда асосий таркиб билан бирга жамоани бошқарганлигини инобатга олсак, ўша тактик кўринишлар, ўйин фалсафаси сақланиб қолиши ва футболчилар билан тезда тил топишиши аниқ. Шунингдек, клубнинг на ўйин услуби, на мақсади драматик тарзида ўзгартирилмаслиги турган гап. Бироқ, Титони ҳурмат қилган ҳолда шуни айтиш мумкинки, у Гвардиола эмас. Клуб ўз ўйин услубида давом этиши мумкин, лекин Пепнинг авторитети, унинг донолиги ва классик фикрлашлари жамоа ўйинларида билиниб қолмаслигидан умид қиламиз. 
Гвардиола "Ноу-Камп"ни тарк этмоқда.
Мен Россел уни олиб қололмади деб айтмоқчи эмасман, футболчилар ҳам ҳаракат қилмади деган фикрдан ҳам йироқман. Чемпионлар Лигасидаги мувафаққиятсизлик уни шу қарорга келишга мажбур қилди деган сабаб ҳам хаёлимнинг бир бурчагини банд қилгани йўқ. Агар сабаб келтириш керак бўлса, унинг матбуот анжуманида айтган фикридан иқтибос келтирмоқчиман: "Тўрт йил давомида ҳар куни катта босимни ҳис қилиб яшадим, футболчиларни руҳлантириш учун катта куч сарфладим. Энди дам олишим керак."
Пепнинг қарорини муҳокама қилишдан йироқман. Лекин, бир нарсани шунчаки таъкидламоқчиман: "Раҳмат сенга, ПЕП!"
Севимли клубимизни тасаввур қилиб бўлмайдиган даражада юксакликка олиб чиққанинг учун,
Бетакрор ва жозибали футбол фалсафасини тадбиқ қилганинг учун,
Ла-Масиянинг ёш футболчиларига имконият эшикларини очиб берганинг учун,
Бускетс, Педро, Куэнка, Телло, Тиаго каби иқтидорларни кашф этиб берганинг учун,
Мессини буюк футболчи қилиб тарбиялаганинг учун,
Хави, Иниеста, Тиаго, Фабрегас каби иқтидорларни қадрлаганинг учун,
Мисли кўрилмаган рекорд - бир мавсумда 6 та кубокни қўлга киритганинг учун,
Тушкунлик вақтида ҳам жамоани кучли ирода кўрсатишга ундаганинг учун,
Мағлубиятни ҳам кулиб қарши олишни ўргатганинг учун,
Биз ҳали мазасини тотмаган гўзал футбол тақдим этганинг учун,
Ва албатта, "Барселона"га Тито Виллановани кашф қилиб берганинг учун - "Раҳмат сенга, ПЕП!"
ПЕП, Каталония - ватанинг, "Ноу-Камп" эса ўз уйинг. Кетишинг кераклигини тўғри қабул қиламиз. Лекин, йўлинг тушганда бирров кириб ўтишга ваъда бер, ахир энг ёрқин хотираларингнинг бари "Барселона" деган ном билан бошланади. Сен биз учун буюк мураббий бўлиб қоласан.

You will always be Mеs Que Un Manager.
Adeu, Pep Guardiola! Moltes gracies per tot!

Visca el Barsa! 

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: