Киритилган сана: 2012-06-03 17:38

Яқинда “Барселон” клубининг вице-сардори Хави – ўтган мавсум ҳақида ва Гвардиоланинг клубдан кетиш борасидаги ўз фикрлари бўйича “Спорт” журналига интервью берди. Биз ушбу интерьвюни сизга тўлиқ ҳолда тақдим этишга қарор қилдик.

-“Футбол ҳаёт-мамот масаласи эмас, балки, ундан ҳам ортиқроқдир” – деган фикрга муносабатингиз?

- Бу таниш фикр. Ҳар куни уйқуга ётишдан аввал бу иборани ўқиб, кейин ухлайман.

- Юқоридаги фикр муаллифи “Ливерпуль” афсонаси Билл Шенклига чиндан ҳам ҳавас қиласизми?

- Ўйлашимча, унинг фикри ҳамма нарсани ўзида мужассамлаштирган: футболдаги ҳаёт тарзи, менинг футболга кириб келишим ва прфессионал футболчи сифатида яшаш тарзим. Футбол мен учун ҳамма нарса ва у менга ўша ҳамма нарсани берди. Бугунги даражага эришиш учун жудаям қаттиқ меҳнат қилдим. Шунингдек, омад ҳаммен томонда бўлди ва ҳозирги айрим муаммоларга қарамасдан, ўзим орзу қилган жойда ёқтирган ишимни қилаётганимдан бахтиёрман.Бугунги кунда баъзиларни омадсизлик таъқиб қилаётганини бир пайтда, менинг ҳолатим яхши эканлигидан хурсандман. Ўзимда бундай ҳолат кўп йиллар давом этишини ҳоҳлардим. Чунки бу менга ёқяпти.

- Мушакларингиздаги муаммоларга қарамай-а?

- Энг асосийси мен ҳар доим, ҳамма вақт футбол ўйнашдан роҳатланаман. Шифокорлар доктор Пруна ва доктор Райкардлар бир неча марта менга “Сен жароҳат олгансан, 10-15 кун футбол ўйнай олмайсан” деб айтишларига қарамай, эртасигаёқ ўйнаб кетардим. Бу мавсумдаги асосий муаммо жароҳатланган вақтимда ҳам футбол ўйнашда давом этдим. Бу менинг мушакларимдан жароҳат олиб, кўп ўйинларни ўтказиб юборганимни англатмайди, лекин, ўйин вақтида оғриқ билан ҳаракатланганим рост.

- Кам-Ноудаги “Реал”га қарши ўйинда ўйинингиз унчалик қовушмади...

- Мен ўша кунги ўйин ҳақида кўп ўйлашни ҳоҳламайман. Ўзимни футбол ўйнашга мажбур қилардим. Яхши ўйнаётгандек эдим...Биз ниҳоят ҳисобни тенглаштирдик... Мен ҳаётда ҳеч қачон мағрур инсон бўлмаганман. Лекин, мен буни бир лаҳзага унутиб, жамоам учун бақириб югуриб юрардим... Бу мен учун шармандали ҳолат эди. Биз голни ўзимиз ҳоҳлагандай нишонладик ва шу аснода Криштианонинг голидан ҳам шунчалик жабр кўрдик...

- Чемпионлар лигасида “Челси”га қарши ўйиндаги мағлубият катта йўқотиш эди, шундай эмасми?

- Ҳа, шундай. Биз ўтган тўрт мавсумда Испания кубоги финалидаги ва Чемпионлар лигаси ярим финалларидаги иккита мағлубият энг оғир дамлар бўлди.

-Қайси бири кўпроқ аламли эди: “Челси” ёки “Интер”?

-Шубҳасиз “Челси”.

-Нима учун?

-Бу адолатсизлик эди. “Интер”га қарши баҳсда итальянлар яхши ҳимоялалнишган ва бизда гол киритиш учун унча кўп вазиятлар бўлмаган эди. Бироқ, “Челси” билан ўйин кўплаб хатолар ва омадсиз вазиятларга бой бўлди. Хусусан, яққол вазиятларда гол уролмаслик, ноаниқ пенальти, икки тўп фарқи билан ғалаба қозониб туриб, сон жиҳатдан устунликка қарамай имкониятлардан фойдалана олмадик. Бу қайтиб рўй бермайди. “Интер”га қарши ўйинда биз иккита гол уришимиз керак эди, ва бу қийин вазифа эди. Лекин, “Челси”га қарши баҳсда ҳаммаси ўз қўлимизда эди ва биз эплай олмадик. Буларнинг барчаси катта йўқотишлар бўлди.

- Чемпионлар лигаси финалида қайси жамоага мухлислик қилдингиз?

-“Челси”да Торрес ва Мата бўлишига қарамай, мен “Бавария”га мухлислик қилдим. Аниқки, уларнинг ўйин услуби “Челси”га қараганда яхшироқ эди. Лекин, финални роҳатланиб томоша қилдим. “Челси”нинг ғалабаси бу тақдирнинг иши. Дрогба ғалаба тўпини киритди ва қаҳрамонга айланди. Бу футбол, ундаги ғалаба кичик деталлар эвазига қўлга киритилади.

- Бу йил Олтин тўп учун кураш қизғин кечадиганга ўхшайди. Нима деб ўйлайсиз?

- Шубҳасиз, бу Мессиники бўлиши керак. Гарчи, Моуриньо Ла Лига чемпиони бўлган Криштиано Роналду муносиброқ деб айтаётган бўлса ҳам. БУнинг сабаби оддий – Моуриньо Роналдунинг мураббийи. Лекин, футболни тушунадиган одамлар ҳақиқий жавобни биладилар. Мессида иккита тезкорлик хусусияти бор: жисмоний ва фикрлаш тезлиги. Бошқаларда эса бундай икки хил хусусият йўқ. Шу сабабдан у биринчи рақамли ва энг яхши футболчидир.

- Лео “Барса”нинг “boss”и эканлиги ростми?

- Нимани назарда тутдингиз?..

- Айтмоқчиманки, у Это’о ёки Иброҳимович каби футболчиларнинг клубдан кетиши ё бўлмаса ким ҳар ўйинда майдонга тушиши каби масалаларни у ҳал қиларкан...

- Бу каби қарорларни мураббий ҳал қилади. У ҳеч қанақасига Ибра ёки Этоо билан тортишиб қолмаган эди. Ечиниш хонасида ҳам Мессининг овози бошқа футболчилар қаторда туради. Чиқарилаётган ҳар бир қарорларни ҳаммамиз биргаликда қабул қиламиз. Жамоа сардорлар гуруҳи (Месси жамоанингбешинчи сардори) қарор қабул қилишда барчанинг фикрларини инобатга олади.Бу ерда ҳеч қанақасига бирор бир футболчи ёки мураббийнинг диктаторлик аломатлари йўқ.

- Пепнинг кетишини билишингиздан аввал, унинг кетишига рухсат бериш учун жамоа тайёр эмас деб айтгандингиз.Ҳозир тайёрмисизлар?

-Бу фикрни айтганимда, биз унинг ўрнига Тито бош мураббий бўлишини билмагандик. Бу биз учун жуда яхши бўлди. Тито Пепнинг ўрнини эгаллаб унинг ишини давом эттиради. Биз унинг тайёр эканлигини кўриб турибмиз ва биз Титони қаттиқ ҳкрмат қиламиз. Биз тўлиқ унга ишонамиз. У футбол ҳақида кўп нарсаларни билади, худди Пепга ўхшаб футбол билан яшайди.У Гвардиолага ўхшайди ва Пеп билан бирга жамоада иккинчи мураббий сифатида иш олиб борди. Энди эса унинг навбати келди ва мен у бу вазифани муваффақият билан бажаришига ишонаман.

- Нега жамоатчилик Тито борасида жудаям кўп шубҳаланишяпти?

- Жамоатчилик ҳамма нарсага ишончсизлик кўзи билан қарайди. Масалан улар Иньеста билан бирга ўйнаб кета олишим ёки Гвардиоланинг яхши мураббий бўлишига ҳам шубҳаланишганди. Шунингдек, Месси гол урмаётган вақтларда “у учун оғир дамлар бошланди”деб айтишаётган эди. Бизнинг жамоатчилик ниҳоятда талабачан, чунки бу бизнинг йўлимиз, бу “Барселона”. Круйфнинг фикри ҳақида менга савол беришганида, мен “Ҳамманинг ўз фикри бор, лекин бу “Барселона” деб жавоб бергандим. Ўн тўрт йилдан буён шу жамоа билан биргаман ва бу жамоа ҳақида ҳамма нарсани биламан. Биз Лапорта , Круйф ва бошқаларнинг фикрини эшитишга тайёрмиз. Биз ўз ишимизни қилишда ва ғалабалр жамоаси эканлигимиўни исботлашда давом этамиз.

-Криштиано “Браса”нинг даври ўтганлиги ҳақида очиқдан-очиқ гапирганда нималарни ҳис қилдингиз?

-Мен унинг фикрига қўшилмайман. Қанақасига давримизнинг тугаши? Биз 19 та унвондан 14 тасини ютдик, улар эса атиги иккитасини. Бу мавсумда эса биз 6 та совриндан 4 тасини қўлга киритдик, улар эса 4 тадан атиги биттасини ўзлариники қилишди. Мен ҳеч қанақасига бизнинг давримиз тугаганлигини кўрмаяпман.

-Абидал касалхонадан чиққандан сўнг, у билан кўришдингизми?

- Йўқ ҳали, лекин у билан кўп марта суҳбатлашдим. Мен унинг шифокорини танийман. У бошқа бир дўстимнинг отасини ҳам операция қилган. У Абидал ўзини яхши ҳис қилаётганини, аввалига айрим муаммолар бўлганини лекин трансплантация қилинган жигар учун меъёрий ҳолат эканлигини айтди.Аби шахсан мен учун спортда ва ҳаётимда улкан жасорат тимсолидир. Биз унга “Барса” учун қилган барча хизматлари эвазига ташаккур айтамиз. Унинг оиласи ҳам ҳурматга сазовор. Операциядан аввал унинг уйига ташриф буюрганимизда ҳаммамиз ҳаяжонланаётган эдик.

-Кейинги мавсумда Вилья ўзини кўрсата оладими?

-Биз унинг қаттиқ курашганининг гувоҳи бўлдик, у билан бирга қийналдик. Сўнгги дақиқаларгача у Европа чемпионатида қатнашиш учун ҳаракат қилди, лекин бунга эришолмади. Тўғрисини айтганда у батамом тузалиб кетгани йўқ. У терма жамоа ва “Барселона”га керак. Биз уни қаттиқ соғиндик, чунки у антиқа голлар киритарди, шу билан бирга у ажойиб дўст ҳамдир.

- Пеп билан хайрлашишга имкониятингиз бўлдими?

- Ҳа, гарчи кўп суҳбатлаша олмаган бўлсак-да, у билан хайрлашдим. У ўтган якшанба Камп-Ноуда бўлган хайрия учрашувида ҳаммамизни бирлаштира олди ва бирга ўтган йиллар учун миннатдорчилик билдирди. Мен Гвардиолага уни соғинишимизни айтдим ва у ҳам худди шу нарсани таъкидлади.

-Йиғладингизларми?

- Йўқ, бу мавсум биз керагидан ортиқ кўз ёш тўкиб бўлдик.

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: