Киритилган сана: 2017-06-21 22:57

Айни дамда эркин агентга айланган Златан Ибрагимовичга бир қанча таклифлар тушмоқда. Гарчи ёши ўтиб бораётган эса-да уни таркибида кўришни истаётган жамоалар кам эмас. Бироқ Златаннинг ўзи яқинда кутилмаган қарорга келди, у бир мавсум бўлса ҳам “Реал”да ўйнамоқчи экан. Бироз бу трансфер амалга ошмаса керак, чунки бунинг ўзига яраша сабаблари бор.

ЗЛАТАН ЗИДАН УЧУН ҚАРИЛИК ҚИЛАДИ

Айни дамда Зинедин Зидан “Реал”ни имкон қадар ёшартириш йўлида ҳаракат қилмоқда. Ҳатто бунинг учун Пепедан ҳам воз кечишга қарор қилган. Айни шундай вазиятда Ибрагимовичнинг сотиб олиниши Зиданга умуман маъқул келмайди, чунки Златан Зиданнинг режалари учун қарилик қилади.

ПЕРЕС УЧУН ОРТИҚЧА БОШОҒРИҚ

Ибрагимович ҳар нарсага кўниб кетаверадиган футболчи эмас. Айнан шу қайсарлиги учун ҳам “Барселона”дан кетган. Айнан шу характери “Реал”да Перес учун қўшимча бошоғриқ туғдириши мумкин. Чунки Мадрид жамоасининг айни дамда иккита етакчиси бор — Рамос ҳурмат юзасидан сардор, Роналду эса ўйин жиҳатдан етакчи. Бундай ўринга даъвогарлик қиладиган учинчи футболчи эса ортиқча, у ҳатто Ибра бўлса ҳам.

БЕНЗЕМА ЗАХИРАГА КЎНМАЙДИ

Зидан ҳеч қачон Бенземани захирага михлаб қўймайди ҳатто Ибрагимович учун ҳам. Бензема ҳам захирага кўнмаса керак, шу боис бошқа жамоага ўтишга ҳаракат қилиши мумкин. Зидан эса табиийки ҳали уч-тўрт йил фойдаси тегиши мумкин бўлган ва энди-енди самарали ўйнашга ўргатаётган Бенземани бир йилдан кейин ҳеч нарсага ярамай қоладиган Ибрага алмашмаса керак.

“РЕАЛ” ИБРАГА МУҲТОЖ ЭМАС

“Реал” Златанга муҳтож эмас. У Америка ёки Хитой клуби эмаски, машҳурликка эришиш, жамоатчилик эътиборини тортиш ёки рекламадан пул ишлаш учун Ибрагимовични жалб қилишга уринса… Қолаверса, Мадрид жамоасида рекламалар орқали клубга катта фойда келтираётган футболчи бор — Криштиану Роналду. У ҳатто бу борада Златандан ҳам устунроқ.

Олдиндан бир нима деб бўлмайди. Аммо, бизнингча, “Реал” Ибрагимовични ўз таркибига қўшиб олмаса керак.

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: