“Катта дубулға” туркумига кирувчи йилнинг дастлабки мусобақаси – Австралия очиқ чемпионати якунига етгач дунё рейтингида катта ўзгаришлар бўлиши кутилмоқда. Бу айниқса аёллар рейтингида яққол намоён бўлиши эҳтимолдан холи эмас.

 

Жумладан, жаҳоннинг биринчи ракеткаси руминиялик Симона Халеп Австралия очиқ чемпионатининг нимчорак финалидаёқ мағлубиятга учради. Оқибатда у қимматли 1 060 очкони йўқотди ва катта эҳтимол билан у келгуси ҳафтада эълон қилинадиган янги рейтингда кучли учликда қолиши ҳам амри маҳол. Унинг рейтингдаги асосий таъқибчиси германиялик Анжелик Кербер ҳам узоққа боролмади, у ҳам нимчорак финалда тўхтади. Даниялик Каролин Возняцки эса ҳатто унданда олдинроқ мусобақа билан хайрлашиб улгурганди. Натижада айни пайтга келиб Халеп ҳамон биринчи ўринни сақлаб турган бўлса-да, Кербер ва Возняцкилар пастлашди. Янги рейтингда 2-ўринга япониялик Наоми Осака кўтарилиб олди. У мусобақада иштирокини давом эттириб, ғолибга айланадиган бўлса борми рейтингда ҳам пешқадамликни қўлга олиши мумкин.

 

Мабодо кунчиқар юрт вакиласи мусобақани чорак финалдаёқ тўхтатса, у ҳолда чехиялик теннисчилар Петра Квитова ёки Каролина Плишкова ҳамда украиналик Элина Свитолиналарда жаҳоннинг биринчи ракеткасига айланиш имконияти туғилади. Хуллас, катта эҳтимол билан янги ҳафтани янги пешқадам билан қарши оламиз.