Австралия очиқ чемпионатининг эркаклар ўртасида иккинчи финалчиси ҳам аниқланди. Кутилганидек жаҳоннинг биринчи ракеткаси сербиялик Новак Жокович ярим финал баҳсида франциялик Люка Пуйга қарши кортга тушадиган бўлди.

 

Учрашув атиги уч сет давом этди ва уларда Пуй номдор рақибини бор-йўғи тўрт геймда мағлуб эта олди – 6:0, 6:2, 6:2. Шу тариқа Жокович Мельбурн кортларида еттинчи бор финалда майдонга тушадиган бўлди. Умуман, серб теннисчиси якшанба куни “Катта дубулға” туркумига кирувчи турнирларда 24-маротаба финал ўйинида иштирок этади. Бу борада у фақат теннис афсоналари Рожер Федерер ва Рафаэль Надалдан ортда қолмоқда.

 

Статистикага эътибор қаратсак, Новак шу кунгача ўзи қатнашган Australian Openнинг биронта ҳам финалида ютқазмаган. Яна бир эътиборли жиҳат, у жаҳоннинг биринчи ракеткаси бўлиб турган вақтида Мельбурн кортларида умуман мағлуб бўлмаган. Яъни, 2012, 2013, 2015 ва 2016 йилларда ушбу ҳолат такрорланган ва жорий йилда ҳам ҳозирча ҳеч кимга Жоковични енгиш насиб этмади.

 

Агар серб теннисчиси якшанба куни ҳам ғалаба қозонса, у фаолияти давомида “Катта дубулға” туркумига кирувчи турнирларда қаторасига учинчи титулни қўлга киритади. Бунгача у ўтган йилги “Уимблдон” турнири ва US Openда ҳам бош совринга сазовор бўлганди.

 

Умуман, Жокович ва Надаль шу кунга қадар ўзаро 52 марта тўқнаш келишган. Устунлик серб теннисчиси тарафда: 27-25.

 

Давоми бу ерда)))