Мамлакатимизда сўнгги йилларда қишки спорт турларини ривожлантиришга алоҳида аҳамият қаратилмоқда. Пойтахтимизда кўп тармоқли “Хумо Арена” муз саройи қурилаётгани ҳам фикримизни тасдиқлайди.

 

Ўзбекистон қишки спорт турлари ассоциацияси ходимлари эса қачон янги муз саройи қурилади, кейин шуғулланишни бошлаймиз, дея қўл қовуштириб ўтиргани йўқ. Улар мавжуд имкониятлардан оқилона фойдаланишга ҳаракат қилмоқда. Жумладан, фигурали учиш спорти ишқибозлари пойтахтимизда фаолият кўрсатаётган “Айс Авеню” муз саройида машғулотлар олиб боришмоқда. Қолаверса мусобақалар ҳам ҳозирча шу масканда ташкил этилаётир.

 

Шу йилнинг 3-4 февраль кунлари бу масканда Жисмоний тарбия ва спорт вазирлиги Ўзбекистон ёшлар иттифоқи Марказий кенгаши билан ҳамкорликда “Тошкент конькилари” Республика мусобақаси ўтказилмоқда.

 

Кеча бошланган беллашувларда жами 60 нафар болалар ва ўсмирлар ғолиблик учун баҳс олиб боришмоқда. Мусобақанинг дастлабки кунида иштирокчилар қисқа дастурда ўз маҳоратларини намойиш этишди. Бугун эса ўсмирлар эркин дастурда ўз чиқишлари билан йиғилганларни хушнуд этишга ҳаракат қилади.

 

“Тошкент конькилари” турнири якунларига кўра энг яхши натижани қайд этган икки нафардан ўсмир ва қиз яна саноқли кунлардан сўнг Россиянинг Южно-Сахалинск шаҳрида бошланадиган “Осиё болалари” (Дети Азии) халқаро спорт ўйинларида қатнашиш ҳуқуқини қўлга киритади.