Киритилган сана: 2012-02-23 01:11

Айтдим-у, сал сабр қилиб турсак, имкониятларимиз ошиб бораверади. БАА энди бизни ютмасдан туриб, Лондонга бориб бўпти! Биз шу ерда эканмиз, ҳали йўлланма қочиб кетгани йўқ. Келсин, ютсин (ё ютқазмасин), бемалол.

Йўқ, бу баландпарвозлик эмас. Олимпия терма жамоамиз Ироқ билан ўйингача ўтказилган олти учрашувда ўз даҳлсизлигини сақлагани, тўрт кун оралағида дунёнинг икки чеккасидан ютқазмасдан келгани ҳақидаги мунозараларда кўпроқ вазиятнинг охирини кутдик, тўғрими? Ҳали гапиришга эрта, Лондон йўлланмаси қўлга киритилсин, кейин гапирса арзийди, дейилди. Кўпчилик.

Энди савол бераман – ҳали ҳеч нарса аниқ бўлмай туриб, нега Ироқ билан ўйиндан кейин тушкунликка тушиб қолдик? Ироқ “совға” жамоа эмас, улардан ҳар ким ҳам ютқазиши мумкин. Демак, доимо вазиятга умумий ҳолда қараган яхшироқ эмасми?

Айтайлик, қуръа ташлаганида ҳаммамиз ўлим гуруҳига тушганимизни тан олгандик. Ана ўшанда, кимдир чиқиб, сўнгги турда БАА ни енга олсанглар, Лондонга тўғридан тўғри борасизлар, деганида ирғишламасмидик? Воқеаларнинг мана шу ривожини орзу қилмаганмидик? Мен ўшандаёқ рози бўлардим, ростан.

Билиб қўйинг, биз икки тур олдидан вазифани ҳал қиладиган даражадаги кучли терма жамоа эмасмиз, бўлмаганмиз. Бунақаси ўша Испания, Германия, Бразилия, Япония каби терма жамоаларнинг саралаш ўйинларида бўлади. Ҳатто француз-у италияликлар ҳам бир нафасда бунақа йўлланмани қўлга киритиб кетаверишмайди. Илк турлардаги омадли учрашувлар туфайли, ўзингизни футболнинг энг олий мақомида кўрган бўлсангиз, сизнинг муаммоингиз. Ўша мақомда лойиқ бўла олмаганликлари учун футболчилар ва мураббийлар айбдор эмаслар. Боримиз шу.

Доим кимларнидир натижасига боғланиб қолаётганимизни айтиб, хафа бўлиш кулгили. Кимнинг қўлига қарабмиз? ФИФА очколарни бизга бердими ёки бошқага? Бугунги Австралия ва БАА ўйинидаги қайси натижа бизни Лондондан четга улоқтирарди? Ҳеч қайси! Ҳаммаси охирги тургача ўз қўлимизда қолади. Билиб қўйинг!

Вазиятга бошқа тарафдан қаранг. Биз олтита ўйиннинг сўнгги иккитасини бой берсак ҳам, иккинчи ўриндан пастга тушмаймиз! Биз Осиё чемпиони бўлмиш БАА га уч очко тортиқ қилинганидан кейин ҳам, фаворитлигимизча қолмоқдамиз. Тошкентдаги ҳар икки ўйинда ишончли ғалабага эришдик. Биз Тошкентда асосий рақибимизни қабул қиламиз. Ҳар қандай ғалаба бизни қониқтиради. Энг кўп “фора”ни биз беряпмиз шекилли? Шундаймасми?

Мен бу орқали ҳали ҳам “ўлар жойда” эмаслигимизни сизга эслатиб, кўнглингизни кўтариш ниятида эмасман. Эътиборингизни бошқа жиҳатга қаратмоқчиман.

Саралаш босқичида ягона ўйин қолди. Битта! “Битта” ўйин дегани бу ҳар нарса бўлиши мумкинлигини билдиради. Ягона ўйинга қараб, кескин хулосалар чиқарилмайди одатда. Йирик турнирларда ҳам мусобақанинг омадли жамоалари деганда икки финалчи тушунилади. Нега? Чунки финалда ҳар нарса бўлиши мумкин. Бир зарбанинг бир сантиметр четлаб кетиши тарози палласини бутунлай ўзгартириб юборади. Яъни “ягона ўйин” ғояси системадан кўра спортга яқинроқ. Ягона ўйин назариядан кўра амалиётга яқинроқ. Ҳаммаси майдонда ҳал бўлади. Сиз ўйингача ҳаммасини тўппа тўғри қилишингиз мумкин. Ҳаммасини. Аммо барибир ютқазишингиз ҳеч гап эмас. Нега бунақа деяпман?

Қаранг, бешта ўйин ўтди, қандайдир хулосалар чиқаришимиз мумкин. Айтайлик, сўнгги ўйиннинг 89 дақиқаси ҳам ўтди. Ҳисоб - 0:0! Кенжа Тўраев дарвозага зарба йўллади. Бўлиши мумкин-а? Зарба дарвоза кирди ва биз ютдик. Лондондамиз! Абрамов – даҳо. Олимпия терма жамоамиз барчасини тўғри бажаришибди. Тайёргарлик ҳам зўр бўлган экан. “Ерни чуқурроқ хайдашибди”. Браво! Энди бироз орқага қайтамиз. Тўраевнинг зарбаси тўсинга тегди. Ҳисоб очилмади. Абрамов – ёмон мураббий. Тайёргарлик жойида бўлмаган! Филиппинга бало борми? Кўряпсизми?

Йўқ. Мен бунга рози эмасман. “Покер” ўйнашни истамайман. Кенжа Тўраевнинг зарбасини кутишимдан мантиқ йўқ. Олимпиадага боришадими, йўқми, бу энди мен учун керакмас мавзу. Керакмас, демайлиг-у, бошқа мавзу. Бугунги мавзу – яъни олимпия терма жамоамиз саралаш босқичида қандай тайёргарлик кўргани-ю, қандай ўйнагани ҳақида хулосам бор. Тўраевнинг зарбаси тўсинга тегадими, тўргами, бундан қатъий назар, бу фикрим ўзгармайди. Асосийси Лондон йўлланмасига ўша битта зарбачалик яқин келишди. Демак, Лондонга бора оладиган жамоа шаклланди. Ким учундир, олимпиячиларимизнинг ўйини умуман ёқмади. Бу фикр ҳам яшашга ҳақли. Яъни, турнир ҳақидаги фикрларимиз сўнгги зарбадаги сантиметрларга қараб қолиши шарт эмас. Муҳими шу.

Йўлланма эса, қилинган меҳнат ва хатони расмийлаштириб, тарихга қайд этади холос. Қайд – бу келажак авлод учун. Мен эса ҳаммасини кўриб турибман. Сиз ҳам.

Фикр билдиринг:

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар: