Ўзбекистон олимпия терма жамоаси Қатарда ўтказилган U23 Осиё кубогини иккинчи ўринда якунлайдиган бўлди.
Японияга қарши кечган финал баҳсида йигитларимиз тўп назорати, рақибга босим уюштириш ва яратилган вазиятлар бўйича устунликка эришишди. Аммо япониялик посбон Лео Кокубо жуда яхши ўйин намойиш этиб, хавфларни бартараф этди.
Ўйиннинг асосий вақти тугаш арафасида майдон марказида Диёр Холматов тўпни йўқотди. Бу хатони эса японлар кечиришмади. Фуки Ямада 18 метрлардан аниқ зарба бериб, ҳисобни очишга муваффақ бўлди.
Иккинчи бўлимга қўшиб берилган дақиқалар ўтиб бораётганида эронлик ҳакам ВАР ёрдамида Япония дарвозасига пенальти белгилади. Умарали Раҳмоналиев бурчак томон куч зарба берди. Аммо Кокубо зарбани қайтаришга муваффақ бўлди.
Шу тариқа, Темур Кападзе жамоаси кетма-кет иккинчи марта кумуш медалларига сазовор бўлди. Япония эса ушбу ёш тоифасида иккинчи марта чемпионликни қўлга киритди.
U23 Осиё кубоги, финал
ЎЗБЕКИСТОН - ЯПОНИЯ - 0:1
Гол: Фуки Ямада (90+1)
Ноаниқ пенальти: Умарали Раҳмоналиев (90+10, дарвозабон)
Ўзбекистон: Абдувоҳид Неъматов, Азамат Мирсаидов, Алибек Давронов, Иброҳимхалил Йўлдошев, Муҳаммадқодир Ҳамралиев, Диёр Холматов, Абдурауф Бўриев, Жасур Жалолиддинов, Руслан Жиянов, Ҳусайн Норчаев, Алишер Одилов
