Аргентиналик ҳужумчи Лионель Месси «Интер Майами» билан шартномаси тугаганидан сўнг фаолиятини она юртида давом эттириши мумкин.
Мессининг Флорида клуби билан амалдаги шартномаси 2025 йил декабригача мўлжалланган. 37 ёшда бўлишига қарамай, у жиддий равишда 2026 йилги жаҳон чемпионатида иштирок этишни мақсад қилган ва юқори савияда ўйнашни давом эттиришни хоҳламоқда.
Carpetasfcb.com нашрининг хабар беришича, «Интер Майами»нинг эгаси Дэвид Бекхэм Мессига 2026 йилгача шартномани узайтиришни таклиф қилган. Бироқ саккиз карра «Олтин тўп» соҳиби учун кутилмаган бошқа вариант ҳам пайдо бўлди. Футболчининг атрофига яқин манбаларга кўра, у жиддий тарзда 2000 йилда «Барселона» академиясига ўтишдан аввал ўйнаган аргентиналик клуби «Ньюэллс Олд Бойз»га қайтиш имкониятини кўриб чиқмоқда.
Бу қарор «Барселона» клуби ва унинг мухлислари учун кутилмаган янгилик бўлди, чунки улар ҳали ҳам Мессини Каталонияда кўришни орзу қилишмоқда. Аммо Месси фаолиятини она юртида якунлаш ва 2026 йилги жаҳон чемпионатига энг яхши ҳолатда тайёргарлик кўриш истаги унинг танловида ҳал қилувчи омил бўлиши мумкин.
