«Манчестер Сити» клуби Рамазон ойи муносабати билан «Этихад» стадионида мусулмонлар учун ифторлик ташкил қилди.
Манчестер клуби маҳаллий ислом дини вакиллари ва мухлисларини стадионга таклиф қилиб, уларга жамоавий ифторлик қилиш имкониятини яратди.
Бу «Сити» томонидан ўтказилган тўртинчи анъанавий ифтор тадбири бўлди. Бу йил унга 120 дан ортиқ меҳмон ташриф буюрди.
Кеча Қуръон тиловати билан бошланиб, кейинчалик «City in the Community» ташкилоти ва клуб вакиллари саҳнага чиқиб, мусулмонлар учун инклюзив муҳит яратиш бўйича амалга оширилаётган ишлар ҳақида гапириб беришди.
Манчестер университети имоми ва Blue Crescent (мусулмон мухлислар клуби) асосчиси Муҳаммад Уллаҳ тадбир юзасидан ўз фикрларини билдирди:
«Биз учун бу тўртинчи ифторлик бўлди ва у иймон, футбол ва жамоатни бирлаштирган ажойиб воқеа бўлди.
«Сити» клуби билан ҳамкорлик қилишдан фахрланаман, чунки улар бошқа жамоаларга ҳам ибрат бўладиган муҳим қадам ташлашмоқда.
Клубнинг мусулмонларга эътибори, мухлислар учун инклюзив муҳит яратишга интилиши ва уларнинг эҳтиёжларини тинглаши катта аҳамиятга эга.
Бу барча мухлислар учун клубга дахлдорлик ҳиссини уйғотади, бу эса биз учун жуда қадрли».
