Саудия Арабистони майдонларида ўтган футбол бўйича U17 Осиё кубогида мардонавор иштирок этиб, чемпионликни қўлга киритган Ўзбекистон ўсмирлар терма жамоаси диёримизга қайтиб келди.
Тантанали кутиб олиш маросими Ислом Каримов номидаги Тошкент халқаро аэропортида ўтказилди. Унда Ўзбекистон Республикаси Бош вазири Абдулла Арипов, Ўзбекистон Республикаси Президенти Администрацияси департаменти раҳбари Одил Абдураҳмонов, Спорт вазирлиги, Ўзбекистон Миллий Олимпия қўмитаси, мамлакат футбол ассоциацияси раҳбарияти, шунингдек, футболчиларимизнинг яқинлари, мухлислар ва ОАВ ходимлари иштирок этишди.
Расмийлар йигитларимизнинг бутун мусобақадаги ёрқин ўйинлари, айниқса, мезбонларга қарши финал баҳсидаги иродали ғалабаларини алоҳида эътироф этиб, уларнинг келгуси фаолиятида ҳам мана шундай шижоат ва куч-ғайрат тиладилар.
Тадбирда Ўзбекистон Республикаси Президенти, Миллий Олимпия қўмитаси раиси томонидан терма жамоа аъзоларига йўлланган табриги, мусобақа ғолиблари ва унинг иштирокчиларини мукофотлаш тўғрисидаги Фармон ўқиб эшиттирилди.
Шундан сўнг терма жамоа аъзоларига Президент совғаси – автомашиналар топширилди. Унга кўра, футболчиларимизга “Cobalt”, бош мураббийга эса “Equinox” машиналарининг калитлари тантанали тақдим этилди.
