Қироллик Испания футбол федерацияси (RFEF) 26 апрель, шанба куни бўлиб ўтадиган Испания Кубоги финалида ишлайдиган ҳакамлар — Рикардо де Бургос Бенгоэчеа ва Гонсалес Фуэртесни ўйиндан олиб ташлаш масаласини жиддий кўриб чиқмоқда. Бу ҳақда "The Athletic" хабар бермоқда.
Манбага кўра, ҳакамларнинг матбуот анжуманидаги баёнотлари уларнинг финалда ишлаш имкониятини хавф остига қўйган.
Аввалроқ “Реал” клубига тегишли Real Madrid TV телеканали де Бургос Бенгоэчеанинг фаолиятини танқид қилган эди. Ушбу ҳакам “Барселона”га қарши учрашув учун бош ҳакам сифатида тайинланган. Матбуот анжуманида бу ҳақда берилган саволга жавоб берар экан, де Бургос кўз ёшларини тийолмади. VARда ишлаши керак бўлган Гонсалес Фуэртес эса Real Madrid TV’нинг видеоси жиддий оқибатларга олиб келиши мумкинлигини айтди.
Маълумотларга кўра, “Реал” клуби RFEF’га мурожаат қилиб, матбуот анжуманидаги сўзлар сабабли ҳакамларни финалдан четлатишни сўраган, аммо федерация бу талабни рад этган. Бунга жавобан “Реал Мадрид” финал олдидан ўтказиладиган барча расмий тадбирларда, жумладан матбуот анжуманида иштирок этишдан бош тортди.
