«Реал» агар Испания Кубоги финалида иштирок этмасликка қарор қилганида, қандай жазо олишини Relevo маълум қилди.
Манбага кўра, агар мадридликлар «Барселона»га қарши финал ўйинида қатнашмаганида, кейинги мавсумда Испания Кубогида иштирок этиш ҳуқуқидан маҳрум бўларди.
Бу ҳолда, финалда «Реал» ўрнига ярим финалда мағлуб бўлган «Реал Сосьедад» иштирок этиши мумкин эди.
Эслатиб ўтамиз, Испания Кубоги финали олдидан ўтказилган матбуот анжуманида бош ҳакам Рикардо де Бургос Бенгоэчеа «Реал» телевидениесидаги танқид ҳақида гапириб, кўз ёши тўкди: «Фарзандам уйга йиғлаб келса, чунки мактабда унинг отасини ўғирликда айблашса — бу жуда оғир». ВАР ҳаками Пабло Гонсалес Фуэртес эса «Реал» телевидениесида чиққан видеоролик учун жиддий оқибатлар бўлишини ваъда берди.
«Реал» ҳакамлар бригадасига нисбатан билдирилган фикрлардан норози бўлган ва уларни алмаштиришни талаб қилган. Хабарларга кўра, ҳатто финалда қатнашмаслик масаласи ҳам кўриб чиқилган. Кейинроқ клуб «Барса»га қарши финални бойкот қилиш эҳтимолини рад этди: «Ҳакамларнинг нотўғри баёнотлари бутун дунё кузатаётган ўйинга соя сололмайди. Футбол қадриятлари устувор бўлиши керак».
