«Манчестер Сити» бош мураббийи Пеп Гвардиола Англия кубоги мусобақасида ишлатиладиган тўп ҳақида яна бир бор танқидий фикр билдирди. Унинг фикрича, Mitre Sports компанияси томонидан ишлаб чиқарилган бу тўп билан ўйнаш жуда қийин ва футболчиларга жиддий ноқулайлик туғдиради.
Эслатиб ўтамиз, «Манчестер Сити» Англия Кубоги ярим финалида «Ноттингем Форест» устидан 2:0 ҳисобида ғалаба қозониб, турнирнинг ҳал қилувчи босқичига йўл олди.
Ўйиндан сўнг журналистлар билан суҳбатда Гвардиола футболчиларда чарчоқ белгилари сезилгани ва бу вазиятда тўпни назорат қилиш қийинлашганини таъкидлади:
«Иккинчи бўлимда "Ноттингем Форест" янада кучлироқ прессинг қила бошлашини олдиндан билардик. Бир неча марта тўпни йўқотдик, чунки футболчиларимизда чарчоқ аниқ сезилди. Тўп жуда тез эди, у ерда сакраб кетиши ҳам ҳар икки жамоа учун муаммо бўлди. Бундай тўп билан ўйнаш, унинг траекториясини олдиндан билиш жуда мураккаб экан».
Шу билан бирга, испаниялик мутахассис жамоасининг финалга йўл олганидан мамнунлигини яширмади ва «шаҳарликлар» яна бир бор соврин учун курашиш имконига эга бўлганидан хурсанд эканини таъкидлади:
«Ҳамма қийинчиликларга қарамай, биз буни уддаладик ва финалга чиқдик. Мен яна Англия кубоги финалида қатнашиш имкониятига эга бўлганимдан хурсандман», — дея қўшимча қилди Гвардиола.
Маълумот учун, «Манчестер Сити» Англия кубоги финалида «Кристал Пэлас» клубига қарши майдонга чиқади. Бу баҳс 17 май санасига белгиланган.
