Мамлакат миллий чемпионатининг 8-тури «ёнаяпти» дўстлар. "Олов ёқишни" ўзбек футболи ватани – қўқонликлар бошлаб беришди. Суперлигага бу йил қайтган жамоа 2025 йилги мавсум пешқадамларидан бири – «Бунёдкор»ни Тошкентда "девор ушлатиб кетди". «Хоразм» эса Жиззахда амалдаги чемпион «Насаф»дан бир очко тортиб олди.
Бугун эса бош мураббийи Улуғбек Бақоевни сақлаб қолишга ҳаракат қилаётган «Бухоро» ЖАРда «Машъал»га имкониятни бой бериб қўйди. Бухороликлар 10 йилдан буён муборакликларни Суперлига доирасида ўз майдонларида юта олишмаяпти.
ОКМК ўзи учун кўнгилли бўлган анъанани бугун яна давом эттирди. Миржалол Қосимов шогирдлари бу йилги чемпионатда учрашувларнинг сўнгги дақиқаларини «ёндиришаяпти» ва ҳеч ким кутмаган камбекларни амалга оширишмоқда. 8-турда «Андижон» Миржалол Қосимовнинг мана шундай "аччиқ ошидан" тотиб кўрди. 3:1 ҳисобида ғалаба қозонаётган, бунинг устига иккинчи таймда бир киши кўп бўлиб қолган Хомяков шогирдлари ютуқни ушлаб қола олишмади. 87-, 90+3- ҳамда 90+7-дақиқаларда киритилган голлар ОКМКга навбатдаги шов шувли ғалабани тақдим этди. Ўз навбатида Олмалиқ жамоаси «Андижон»га ўз майдонида бунгача биронта ўйинни бой бермаган эди: 13 та ўйин, 9 та ғалаба, 4 та дуранг. Бу борада ҳам ёқимли анъана давом этди.
Ва ниҳоят Термизнинг «Сурхон» жамоаси 22 йилдан кейин мамлакатимизнинг энг номдор жамоаси «Пахтакор»ни ўз майдонида таслим этди.
