Хитойнинг Ҳоҳҳот шаҳрида аёллар футзали бўйича Осиё кубогида гуруҳ босқичининг 2-турига старт берилди. Тур доирасида Ўзбекистон миллий терма жамоаси Австралияга қарши майдонга чиқди.
Ўйиндаги ҳисобни "яшил қитъа" вакиллари 11-дақиқада очишди. Орадан 3 дақиқа ўтиб Гулзода Амирова мувозанатни тиклади.
Иккинчи бўлимнинг дастлабки дақиқалари жамоамиз учун омадли чиқди. Фаррух Зокиров шогирдлари баҳснинг 24 ва 28-дақиқаларида Оминахон Валихонова ва Шодия Тошева томонидан урилган голлар эвазига орадаги фарқни иккитага ошириб олишди.
Австралияликларнинг иккинчи таймнинг иккинчи ярмини ўйновчи дарвозабон тактикасида ҳаракат қилишди. Дарвозабонимиз Ангелина Полишкевич рақибнинг бир қатор зарбаларини қайтарди. Ўз навбатида ўзбекистонликлар рақибнинг бўш қолган дарвозасини ишғол қилиш учун камида 5 марта имкониятга эга бўлишди. Аммо футзалчиларимизнинг зарбаларига аниқлик етишмади. Бир вазиятда тўп рақиб дарвозаси устунига тегиб қайтди.
Шу тариқа, Ўзбекистон 2-турда 3:1 ҳисобида ғалаба қозонди ҳамда жадвалда 3-ўринга кўтарилиб олди.
Маълумот ўрнида. Гуруҳларда биринчи ва иккинчи ўринни эгаллаган жамоалар ҳамда учинчи ўринни банд этган энг яхши кўрсаткичга эга бўлган яна икки терма жамоа чорак финалга йўл олади. Шу маънода кураш охирги турга қадар давом этади.
ОСИЁ КУБОГИ
"А" гуруҳи, 2-тур
АВСТРАЛИЯ - ЎЗБEКИСТОН – 1:3
Голлар: Даиси Арровсмитҳ 11ʼ — Гулзода Амирова 14ʼ; Оминахон Валихонова 24ʼ Шодия Тошева 28
Ўзбекистон 3-турни 10-май куни Хитойга қарши ўтказади. Ўйин 17:00да бошланади.
