Италиялик мутахассис Карло Анчелотти Бразилия терма жамоасининг бош мураббийига айланиши расман маълум қилинди. Бу ҳақда Бразилия футбол конфедерацияси (CBF) эълон қилди.
«Карло Анчелоттини Бразилия терма жамоасига таклиф этиш – бу шунчаки стратегик қадам эмас. Бу бутун дунёга юборилаётган хабар: биз шоҳсупанинг биринчи поғонасига қайта чиқишни мақсад қилганмиз.
У – тарихдаги энг буюк мураббий, ва энди у дунёдаги энг йирик терма жамоани бошқаради. Биз биргаликда Бразилия футболининг янги шонли саҳифаларини ёзамиз», – деди CBF президенти Эдналдо Родригес.
Анчелотти терма жамоа билан ишни июн ойида Эквадор ва Парагвайга қарши ўйинлардан бошлайди. У терма жамоани 2026 йилги Жаҳон чемпионатигача бошқаради.
Маълумотларга кўра, 65 ёшли мутахассис Ла Лиганинг сўнгги турида «Реал Сосьедад»га қарши ўйиндан кейин «Реал Мадрид»ни тарк этади ва 26 май куни Бразилия терма жамоасидаги фаолиятини бошлайди.
Карло Бразилия эркаклар терма жамоаси тарихидаги биринчи хорижлик бош мураббий бўлади.
