"Реал" жамоасининг бразилиялик вингери Винисиус Жуниор Карло Анчелоттига очиқ хат ёзди. Аввалроқ жорий мавсум тугагач, италиялик мураббий клубни тарк этишини эълон қилганди.
"Раҳмат, мураббий. Ҳамма нарса учун. Сиз энг зўрисиз. Мадридга келганингиздан бери сиз менинг ҳаётимни ўзгартирдингиз — футболчи сифатида ҳам, инсон сифатида ҳам. Сиз менга ишонч бағишладингиз, ривожланишимга ёрдам бердингиз ва доимо мен билан бирга бўлдингиз — майдонда ҳам, ундан ташқарида ҳам.
Биз икки бор Чемпионлар лигасини, икки бор Ла Лигани ва яна кўплаб бошқа мукофотларни қўлга киритдик… Лекин энг кўп қадрлайдиганим — бу менга бўлган муносабатингиз, камтарлигингиз ва шу йиллар давомида менга қандай муносабатда бўлганингиз. Сиз доимо мени ҳимоя қилдингиз ва менга энг зарур пайтларда таянч бўлдингиз.
Бугун "хайр" дейиш жуда қийин. "Реал"нинг кийиниш хонаси сизга муҳтож бўлади. Мен ҳам муҳтож бўламан. Лекин шу билан бирга, мени хурсанд қиладиган нарса — бу сиз билан қайта кўришадиган кун аниқ экани. Бу сафар — Бразилия терма жамоаси либосида бирга бўламиз. Бу тақдир. Мен сизни Бразилияда кутаман.
Мухаббат билан, Вини-жуниор", — деб ёзди бразилиялик футболчи ўз ижтимоий тармоқларида.
