Франциянинг “ПСЖ” клуби УЕФА Чемпионлар Лигаси финалида эришган йирик ғалабаси эвазига 25 миллион евро мукофот пули қўлга киритди. Парижликлар турнирдаги умумий иштироки учун эса жами 146 миллион евро даромад олди.
Турнир давомида клублар ўз натижаларига қараб УЕФА томонидан белгиланган мукофот пулларини қўлга киритишди. Мукофотлар қуйидагича тақсимланган:
- гуруҳ босқичидаги ҳар бир ғалаба учун — 2,1 миллион евро
- ҳар бир дуранг учун — 700 минг евро
- 1/8 финалга чиқиш — 12,5 миллион евро
- чорак финал — 15 миллион евро
- ярим финал — 18,5 миллион евро
- финалдаги ғалаба — 25 миллион евро
Бундан ташқари, клублар УЕФА томонидан ажратиладиган маркетинг даромадлари ва трансляция ҳуқуқларидан ҳам фойда кўради.
Финалда “ПСЖ”га 5:0 ҳисобида йирик мағлубиятга учраган “Интер” эса турнирдаги иштироки учун жами 136,6 миллион евро ишлаб топди. Ушбу суммага финалга чиққани учун олинган 15 миллион евро ва олдинги босқичлардаги барча мукофот пуллари киради.
“Арсенал” ЕЧЛ ортидан энг кўп даромад қилган 3-жамоага айланди. Лондонликлар турнирдаги иштироки эвазига 117 миллион евро қўлга киритган.
Шунингдек, “ПСЖ” УЕФА Суперкубоги доирасида Лондонда бўлиб ўтадиган баҳсда иштирок этади ва бу ўйин учун яна 4 миллион евро мукофот пули олади.
Эслатиб ўтамиз, Чемпионлар Лигаси финали кеча, 31 май куни Мюнхен шаҳридаги “Allianz Арена” стадионида бўлиб ўтди. Унда “ПСЖ” “Интер”ни 5:0 ҳисобида мағлуб этди. Бу Париж клуби тарихидаги илк Чемпионлар Лигаси кубоги ҳисобланади.
