Бугун FIFA расмий сайтида Ўзбекистоннинг ЖЧ-2026 га чиқиш имконияти ҳақида мақола эълон қилди.
Жаҳон чемпионатида доимий қатнашиб келаётган Бразилия (22 марта), Германия (20 марта) ва Аргентина (19 марта) каби грандлардан фарқли ўлароқ, FIFA’га аъзо бўлган 211 мамлакатнинг 62 фоизидан ортиғи ҳали-ҳануз футбол оламидаги энг йирик мусобақада иштирок этиш бахтига муяссар бўлмаган.
Бироқ, 2026 йилда илк бор 48 жамоа иштирок этадиган Жаҳон чемпионати бу статистикани жиддий ўзгартириши мумкин. Агар 2022 йил Қатар мезбон сифатида ягона дебютант бўлган бўлса, 2026 учун дастлабки йўлланмаларни қўлга киритган етти жамоа бундан аввал ҳам ЖЧда иштирок этган. Аммо яқин вақтларда тарихда илк марта иштирок этувчи мамлакатлар сони ортиши кутилмоқда.
FIFA сайти 2026 йилги Жаҳон чемпионатида дебют қилиш учун асосли имкониятга эга бўлган тўққизта мамлакат ҳақида маълумот берди. Уларнинг ичида Ўзбекистон ҳам бор.
Ўзбекистон – “Оқ бўрилари” тарих яратиш арафасида
FIFA рейтинги: 57-ўрин
Аҳолиси: 37 миллион нафар
Бархам топмаган орзу – бу Ўзбекистон миллий жамоасининг Жаҳон чемпионатида иштирок этиш истагидир. 2026 йилдаги мусобақа эса ушбу орзунунг амалга ошиши учун энг реал имконият бўлиб турибди.
2024 йил март ойидаги Теҳрондаги драматик дуранг (2:2) натижасида, Эрон терма жамоаси сўнгги 7 дақиқада киритган гол орқали кейинги босқичга йўл олган ва бу ҳолат вақтинча бўлса-да, Ўзбекистоннинг чемпионатда қатнашиш орзусини кечиктирган эди.
Шу билан бирга, Тимур Кападзе бошқарувидаги “Оқ бўрилари”нинг имкониятлари ҳали ҳам юқори. Улар Жаҳон чемпионати саралаш босқичи A гуруҳида 5 ғалаба ва 2 дуранг билан 8 учрашувдан сўнг БААдан 4 очкога устун ҳолда иккинчи ўринни эгаллаб турибди. Энг муҳими, улар учун тарихий марра сари қадам ташлаш учун фақатгина яна 1 очко етарли — бунинг учун эса Абу-Дабида БААга қарши ўйинда дуранг қайд этишнинг ўзи кифоя.
Ўзбекистон миллий терма жамоаси тарихда биринчи марта Жаҳон чемпионатида иштирок этиш учун жуда яқин турибди. Мустақилликнинг 30 йилидан ошиқ даврида орзу бўлиб келган ушбу марра бу сафар амалга ошиши мумкин. FIFA ҳам буни эътироф этиб, расмий сайтида Ўзбекистонни дебютга яқин турибдиган етакчи номзодлар рўйхатига киритди.
