“ЦСКА” клуби собиқ футболчиси Валерий Масалитин Match TV телеканалига берган интервьюсида жамоа ярим ҳимоячиси Аббосбек Файзуллаев ҳақида ўз фикрини билдирди.
Унинг таъкидлашича, ўзбекистонлик футболчини ижарага бериш ва кейинроқ юқори нархда сотиш мақсадга мувофиқ бўлади.
"Аббосбек Файзуллаев бу мавсум яхши ўйин кўрсатмади. Сабаби, мураббий доим ротация қилди. У ўз салоҳиятини тўлиқ очиб бера олмаяпти. Уни ижарага бериш керак, шунда Аббосбекнинг ўйини яна яхшиланиб кетади. Кейин эса уни яхши пулга сотиш мумкин. Файзуллаев иккинчи даврада деярли “ЦСКА”га ёрдам бера олмади. У ҳаракат қилди, лекин буларнинг барчаси самарасиз якунланди", деди Масалитин Match TV телеканалига.
Аббос Файзуллаев 2024/25 йилги мавсум Россия Премьер Лигаси доирасида 27 ўйинда майдонга тушиб, ўз ҳисобига 2 та гол ва 4 та голли узатма ёздириб қўйди.
“ЦСКА” Россия чемпионатини 3-ўринда якунлади. “Армиячилар” 1 июнь, якшанба куни Россия Кубоги суперфиналида “Ростов”га қарши ўйнади ва пенальтилар сериясида ғалаба қозониб, бош совринга эга чиқди.
Эслатиб ўтамиз, аввалроқ ОАВда Файзуллаевга Германиянинг “Бавария” ҳамда Туркиянинг “Бешиктош” клублари жиддий қизиқиш билдираётгани ҳақида хабарлар тарқалган эди.
