Испаниянинг El Chiringuito телеканали журналисти Хосеп Педрероль «Реал Мадрид» жамоасининг трансферлари ҳақида маълумот берди.
Манбанинг хабар беришича, «Реал» Лиссабоннинг «Бенфика» жамоасида тўп сураётган чап қанот ҳимоячиси Альваро Каррерасни сотиб олиш бўйича келишувга эришган ва футболчини Клублар ўртасидаги жаҳон чемпионатида жамоа сафида ўйнатиш учун шартнома тузиш арафасида турибди. Бунинг учун мадридликлар португалиялик клубга маълум миқдорда компенсация тўлайди. Қайд этиш жоизки, «Бенфика» ҳам ушбу мусобақада иштирок этади.
Шунингдек, Педрерольнинг таъкидлашича, «Реал» раҳбарияти бразилиялик вингер Родриго Гоэс жамоада қолишни исташ-истамаслиги борасида олдингидай ишончга эга эмас. Клуб футболчининг кетиш эҳтимолини истисно қилмаяпти ва унга муносиб ўринбосар қидирилиши мумкин.
Маълумот учун, 22 ёшли Каррерас ўтган мавсумда «Бенфика» таркибида барча мусобақаларда 50 та ўйинда иштирок этган, 4 та гол урган ва 5 та голли пас билан тўплаган. Унинг клуб билан амалдаги шартномаси 2029 йил ёзигача мўлжалланган. Transfermarkt портали маълумотларига кўра, футболчининг бозор баҳоси 35 миллион еврони ташкил қилади.
Родриго эса ўтган мавсумда 50 та ўйинда майдонга тушиб, 13 та гол ва 10 та голли узатма билан иштирок этган. Унинг «Реал» билан амалдаги шартномаси 2028 йил ёзигача амал қилади. Transfermarkt'да келтирилган маълумотга кўра, унинг тахминий нархи 100 миллион еврони ташкил қилади.
