Ўзбекистон миллий терма жамоаси футболчиси Аббосбек Файзуллаев кеча Москва–Дубай йўналиши орқали Бирлашган Араб Амирликларига етиб борди. “ЦСКА” клуби футболчиси бўлажак ўйинлар ҳақида Ўзбекистон футбол ассоциацияси матбуот хизматига қуйидагича фикр билдирди.
"Россия кубогини қўлга киритганимдан жуда хурсандман. Бу — “ЦСКА” билан биринчи совриним. Терма жамоанинг муҳим учрашувлари олдидан бундай ютуқ яхши кайфият бағишлайди, бу эса ўйинга ҳам ижобий таъсир қилади.
Терма жамоа билан илгари ҳам кўплаб йиғинларда қатнашганман, жамоага мослашишим қийин эмас. Барча футболчилар билан танишман, улар мени илиқ кутиб олишди.
5 июнь куни бизни муҳим ўйин кутмоқда. Жамоамиз жанговар кайфиятда, тайёргарлик ҳам юқори даражада. Худо хоҳласа, олдимизга қўйилган вазифани бажариб, Жаҳон чемпионати йўлланмасини қўлга киритамиз", — дейди Файзуллаев.
Эслатиб ўтамиз, ҳозир Ўзбекистон терма жамоаси А гуруҳида 17 очко билан 2-ўринни эгаллаб турибди. Темур Кападзе бошчилигидаги жамоа 5 июнь куни БААга қарши майдонга тушади. Ушбу беллашувда қўлга киритилган бир очко Ўзбекистонга мундиал йўлланмасини тақдим этади.
Учрашув Абу-Дабидаги “Ан-Наҳян” стадионида бўлиб ўтади. Ўйин Тошкент вақти билан соат 21:00 да бошланади.
