Ўтган мавсум “Галатасарой”да ижара асосида ўйнаган “Наполи” ҳужумчиси Виктор Осимҳен иккита расмий таклиф олди — бири Туркиядан, иккинчиси эса Саудия Арабистонидан. Бу ҳақда журналист Патрик Бергер ўзининг Х (собиқ Twitter) саҳифаси орқали хабар берди.
Манбага кўра, “Галатасарой” 26 ёшли нигериялик футболчига тўрт йиллик шартнома асосида йилига 15 миллион евро маош тўлашини маълум қилган. Бу — клуб тарихидаги энг катта молиявий таклиф ҳисобланади. Саудия Арабистонининг “Ал-Ҳилал” клуби эса солиқлардан ташқари йиллик 40 миллион евро маош тўлашга тайёр.
Шунингдек, Осимҳен Истанбулда ўзини бахтли ҳис қилаётгани таъкидланмоқда. Шу боис , “Галатасарой” футболчининг трансфери учун “Наполи”га 60–65 миллион евро миқдорида товон пули тўлашга тайёр, бироқ унинг шартномасидаги тўлов банди 75 миллион еврони ташкил қилади. Унинг келажаги бўйича қарор яқин кунларда қабул қилиниши кутилмоқда.
Осимҳен 2024/25 йилги мавсум “Галатасарой” таркибида 37 та ўйинда майдонга тушиб, ўз ҳисобига 32 та гол ва 6 та голли узатма ёздириб қўйган. Унинг “Наполи” билан амалдаги шартномаси 2026 йил ёзигача амал қилади.
Эслатиб ўтамиз, ҳозир “Ал-Ҳилол”да Жаоу Канселу, Калиду Кулибали ва Рубен Невеш каби футболчилар тўп суради.
